Fifa Best women’s player of the year Aitana Bonmati

Fifa Best women’s player of the year
Aitana Bonmati
A zawn zata a vawi thumna atan Barcelona midfielder Aitana Bonmati chu Fifa Best Awards sem inkhawmah women’s player of the year atan thlan a ni leh ta a; England manager Sarina Wiegman pawhin a tum ngana atan coach of the year trophy a dawng bawk.
Kum 27-a upa Bonmati hian Euro 2025-ah khan player of the tournament prize dawng bawk mah se final-ah Spain chu England lakah a chakpui zo lo a; Spain team tana a thawhhlawk em avangin tournament chhunga thiam berah an thlang a, tunah a tum thumna atan Fifa women’s player of the year a ni chhunzawm leh ta a ni.
He chawimawina a humhim leh theihna kawngah Spaniard hi club lamah pawh a chetha cher cher hle a; season liamta khan Barcelona chu domestic treble champion a nihpui a, La Liga F-ah goal 12 thunin, assist vawi ruk a nei tling bawk.
Kumin hmeichhe Euro ang bawkin La Liga F lamah pawh mimalin langsar leh ber mah se Champions League final-ah a team chu Arsenal lakah chakpui zo loin runner-up bawk an ni leh!
Champion zo lo mah se he competition-ah hian Uefa chuan Bonmati hi player of the season atan a thlang zui leh tho a; he chawimawina dawng thei tur hian match 11-ah goal kua a tilut tling a, Chelsea khelmual semi-final second-leg match-a 4-1 hnehna an chan tumin goal a thun nghe nghe.
Fifa award a dawn hnuah Spain international chuan a tan chawimawina a nih thu leh a khelhpui player, coach leh fan awm lo se mimala a dawn theih dawn loh thu tarlang tel chungin a award dawn chu a hlimpui dawn khawp tih a sawi.
Kumin September thlaa women’s Ballon d’Or trophy pawh lo dawng tawh Bonmati hi Fifa women’s player of the year atan tum thum thlan hmasakber leh awmchhun la niin, kum 2023 leh 2024 khan a lo dawng tawh bawk a ni.
Kum 2023-a Fifa Best award a dawn chhan bulpui chu World Cup-a Spain a champion-pui vang kha niin, nikum khan Barcelona chu history siampuiin title pali tehreng a lakpui bawk!
Kumin hian Arsenal leh Spain midfielder Mariona Caldentey bakah Barcelona forward Alexia Putellas-te chu Fifa Best award dawng thei tura nominee dang an ni.
Lawmman dang
Tarlan tawh angin, England hmeichhe team head coach Wiegman chuan a tum ngana atan coach of the year award a dawng leh ta a; hei hi Lionesses kuta a zawna European title a chhunluh vang niin, nikum pawh khan he trophy bawk hi a lo dawng tawh a, vawi nga dawng thei awmchhun a la ni.
Kumin hian award dawng thei tura khalhfal dang Chelsea manager Sonia Bompastor leh Arsenal boss Renee Slegers-te a hmakhalh leh ta a ni.
Hampton kutah goalkeeper award
England goal-veng Hannah Hampton chu Best Fifa goalkeeper award dawngtu niin, kumin Ballon d’Or ceremony-ah pawh khan keeper tha ber lawmman Yashin Trophy a lo dawng tawh a, tunah Fifa Best awarda dawng zui leh ngat a ni.
Best Fifa women’s goalkeeper a nih theihna kawngah Hannah hian kumin nipui thawt lai khan England chu European title an kawl lai a humhimpui a; kha mi tum khan an lama goal lut tur match 13 chhung zet a dang tluan a, tournament chhunga keeper thiam ber lawmman Golden Glove a dawng nghe nghe.
Kum 25 mi hian season liamta khan Chelsea chu domestic treble-winning team a nihpui bawk.
Hampton-in hian Fifa chawimawina a dawn theihna kawngah England manager Wiegman leh Chelsea boss Bompastor-te chungah lawmthu a sawi a, a laka rinna an nghah tlat vang a nih thu a sawi.
Euro 2025-ah khan England game zawng zawng khel kimin, Women’s Super League season liamtaah khan Chelsea game zawng zawngah a lut kim vek bawk a, hneh lo nei miah loin London club a khawsakpui tluanchhuak!
Marta Award
Tuntum Fifa women’s football award sem inkhawma goal mawi ber (best goal) khungtu atana thlanchhuah chu Lizbeth Ovalle niin, kumin March thla Mexico Liga MX Femenil match pakhata Tigers tana Guadalajara laka a scorpion kick hrinchhuah goal pui tak hmang khan Marta Award a dawng.
Ovalle hi tunah chuan US lamah insawn tawhin, National Women’s Soccer League-ah Orlando Pride thuam a inbel mek.
Best XI thununtu Barcelona
Best Fifa women’s XI thlanchhuah takah Euro 2025 champion England chuan player pali thawh bawk mah se club lama player thawh hnem ber chu Barcelona an ni a, an player paruk ngawt an lang thawt!
Leah Williamson leh Alessia Russo-te pawh Champions League-a Arsenal champion-pui manah an lang a; Chelsea player pahnih Hampton leh Lucy Bronze-te hming pawh he team-ah hian hmuh tur a awm ve bawk.
Best XI:

Hannah Hampton (Chelsea), Lucy Bronze (Chelsea), Leah Williamson (Arsenal), Irene Paredes (Barcelona), Ona Batlle (Barcelona), Aitana Bonmati (Barcelona), Patricia Guijarro (Barcelona), Claudia Pina (Barcelona), Mariona Caldentey (Arsenal), Alessia Russo (Arsenal), Alexia Putellas (Barcelona)