AMKA State Karate Championship

On Dec 18, 2025 10 0

AMKA State Karate Championship
December ni 17, 2025 (Nilaini) atangin Mizoram State Sports Council (MSSC) Golden Jubilee 29th AMKA State Karate Championship 2025-26 chu Aizawl West Joint YMA HAll, Aizawlah tan a ni a; championship hi khuallian niin Food, Civil Supplies & Consumer Affairs etc. minister B. Lalchhanzova chuan MSSC Golden Jubilee meichher chhit alh pahin a hawng.
Karate inelna hi kum 5 hnuai lam atanga senior thlengin Kata leh Kumite-ah mipa leh hmeichhia inelna buatsaih a ni a; district hrang hranga karate zirna 17 atangin player 430 vel an tel thei a, championship hi December ni 19, 2025 (Zirtawpni)-ah zawh a ni ang
All Mizoram Karate Association (AMKA) buatsaih championship hawngtu minister chuan khualzahawm Dr. Lalhmachhuana leh AMKA hruaitute leh chanvo neitute an hming lamin chibai a buk a, player-te che vel a hmuh atangin karate chu mahni inthunun zirna tha tak a nih thu a sawi.
AMKA hruaitute inpekna chu ropui a tih thu politician hian tarlang telin, rawngbawlna ropui tak a nih thu a sawi a; rawngbawlna tih hian biak ina inkhawm te, kohhrana inhman hrim hrim piah lamah naupang ding leh vei pawh la thliar thiam lote enkawla hmalam eng tak an neih theihna tura an kaihhruaina chu rawngbawlna ropui tak a nih thu hmaichhanah a hrilh a, theih tawp chhuah lehzual turin a fuih bawk.
Mizoram State Sports Council vice president ni bawk Dr. Lalhmuchhuaka pawhin thu sawiin, kum 2036-ah India rama Olympic nghat turin India chuan theihtawp a chhuah mek a, chu mi huna Mizoramin karate kaltlanga Olympian nei turin coach-te’n training kalpuiin theihtawp an chhuah mek tih a sawi a, karate naupangte chu hlawhtlinna changa game hrang hranga incentive dawng thei tura tan la zel turin a fuih.
Championship hawnnaah hian AMKA secretary Sensei Lalropuia Pautu hnen atangin report ngaihthlak a ni a; Rev. Dr. Lalchawimawia’n hunserh hmangin, C. Lalhlimawmi’n zaiin kalkhawmte a awi a, demonstartion hmuhnawm tak thlirho a ni bawk.
All Mizoram Karate Association president R. Zomawia pawhin thu sawi bawkin, karate chu ruihhloa an fihlim thin thu sawiin naupangte a fuih a, nu leh pa thuawih pawimawhzia uartakin a tarlang tel.