India-in Iran-a zin rih lo turin a mite chah

Iran-a thil man sang leh khawsakna man sang lutuk avanga mipuiin lungawi lohna nasa taka an lantir mek karah India chuan a mite chu loh theih loh thil lovah chuan tlawh rih lo turin a chah.
External affairs ministry-in India leh Iran-a awm mek Indian-te hnena Thawhtannia ngenna a tihchhuahah hian thil thleng ngaihvena lungawi lohna lantir nasatna lai phei chu a theih ang anga kalsan turin a chah.
“Tun hnai thil thleng mek thlirin Indian-te chu tul bik thil, ngei ngei ngai lovah chuan Islamic Republic of Iran hi thu thar dang a awm leh hma chu tlawh rih lo tura ngen kan ni,” tiin thuchah tihchhuah a ni.
Iran-a Indian leh PIO-te chu ‘thil thleng ngaihven chungin lungawi lohna lantirna hmunte thleng lo tura inven ni se, Indian embassy website leh social media ngaihchan reng ni se’ tiin chah an ni.
Resident visa hmanga Iran-a Indian awm mekte pawh Indian embassy-a inziak lut vek tura ngen an ni bawk.
Iran-ah hian Indian 10,000 chuang an awm mek a, a tam ber hi zirlai an ni a. Shia Muslim biakzin thahnem takin an tlawh mek reng bawk.
Indian sorkarin zin chungchanga ngenna a tihchhuah mek lai hian US President Donald Trump-a chuan Iranian thuneituten mipuite tharuma a bei let a nih chuan inrawlhah a vau mek bawk a. Report thenkhatah chuan lungawi loh lantirnaah hian venhim hna thawktu telin mi 15 chuang thi an awm tawh a, chawlhkar khat chuang liam ta atanga tan kha niin kum thum chhunga hetiang mipui lungawi loh lantirna lian ber a tling mek.
“Ngun takin kan thlir reng a. Tun hmaa an tih thin anga mi an that a nih chuan US-in na takin a chhu ve turah ka ngai,” tiin Trump-a hian Pathianni khan Air Force One-a a chuan laia thuthar lakhawmtute a kawmnaah a sawi a ni.
Iranian Supreme Leader Ayatollah Ali Khamenei chuan an ram chu ‘hmelmate hmaah a bawkkhup dawn lo’ tih a sawi ve bawk a, Iranian thuneitu sangte chuan an chhehvela US sipaite lakah a chhan letna an pek ve theih thu an sawi bawk.
Hetih lai hian Iranian President Masoud Pezeshkian-a chuan interior ministry hnenah mipuite chu ‘zahngai leh dimdawi takin’ hmachhawn turin a ti a, ‘khawtlang rilru hi tharuma hmin theih chi a ni ngai lo’ tih a sawi.
Mipuite lungawi lohna hi Irana province 31-a 23-ah lantir niin AFP chuan a tar lang a. Chawlhkar khat chuang liam taah sumdawng leh dawrkaiten bul tanin zirlaiah a kang kai a, province khawpui lianah a kai ta zel a ni.
Iran-ah hian March, 2025 hnu atangin thil man 36% chuangin a sang tawh a,Iranian rial-in dollar lakah a hlutna hlohvin mi tam tak khawsak a harsat phah hle a. Khawthlang ramten an nuclear programme avanga a hrek bawk avangin an dinhmun a chhe hle a ni.