A chawlh hnua club neih tum Messi

A chawlh hnua club neih tum Messi
Major League Soccer club Inter Miami lama a contract kal lai a hman zawh rual hian Miami-a chanvo lian neitu David Beckham-a hnungzuiin club owner nih ve a duh thu Lionel Messi chuan tunhnaiah a sawi chhuak!
Kum 38 mi lai ni ve tawh chunga khawvela footballer tha bera ngaih la ni thei Messi hian kumin nipui thawt laiin a eizawn mekna America ramah Fifa world cup a khel leh zet tura ngaih a ni a, Argentina title kawl lai a humhimpui emaw pui lo emaw a kumte a lo tam ve ta bawk nen a hnu lamah chuan chawlh lam a hawi chhoh hnaih ve tawh mai a rinawm a, chutih hunah chuan coaching lam luhchilh loa club neitu nihna lam a tuipui dawn tih a chiang chho ta.
Kum 2028 thleng Miami club-a contract la nei Argentina legend chuan, “Coach ni tur zawng chuan ka inngaihtuah ngai lo. Mahnia club neih ve ka duh a, a mawngphah atanga bul tan zet hnua club liana invawrh chhoh lam hi ka tuipui zawng a ni.
“Naupangte ei tling tura kaihhruai leh dawmkan chhoh lam hi ka tuina a ni a, chu kawng chu ka zawh a nih chuan ka tui chho ngawt ang,” a ti.
MLS MVP atana vawi hnih thlan tawh leh tum riat ngawt Ballon d’Or winner ni tawh Messi thu leh hla thar ber hi Thawhlehni khan Argentine streaming channel Luzu TV chuan an tichhuak a ni.
Nikum khan Messi hian a team vawn lai Inter Miami chu an club chanchina a vawi khatna atan MLS Cup championship-ah hlawhtlinna a chanpui a; MSL Cup-a a contract neih mekah hian a chawlh huna chanvo tam tham vak lo a neih theihna tur kawng bilh tel a ni.
Nikum May thla khan MLS leh FC Barcelona lama a team-mate hlui Luis Suarez chuan an ram Uruguay lamah fourth-division club thar Deportivo LSM a din chhuak a, a hawnnaah Suarez-a thian nghet Messi hian tawiawmin, club dinna kawngah a pui bawk.
Kha mi chungchang kha ESPN Uruguay lamah Messi chuan sawichhuakin, “Hun remchang min siamsak avang leh kum tam tak a lo buaipui tawh he project-a tel ve tur leh chanpualte pawh nei ve hial tura min sawm avangin Luis chungah hian ka lawm a, he team hian hma pawh a sawn hle a ni.
“Club dinna kawnga ka tel ve thei hi ka tan chawimawina a ni a, he club thanlen zelna tur kawngah hian kan luanchhuah zui zel pawh ka beisei,” a ti.
Messi leh Miami hian February ni 21 khian Los Angeles FC luhkhung chungin 2026 Major League Soccer regular season bul an tan chho leh tawh dawn a ni.