Thyroid enkawl \hat loh lung tan a pawi

Thyroid problem nei hi kan lo tam khawp mai a, chutihrualin natna a zawnga ngaihthah leh enkawl that loh ber pawl a ni thei hial mai awm e. Thyroid chu phengphehlep pianzia ang deuh gland lian vak lo, nghawnga awm a ni a, mahse, a hnathawh hi a pawimawh riau si a ni. Kan taksa hnathawh chak leh muan dan control-tu a ni tlat. Kan lungphu ran dan atanga metabolism bakah kan mood leh thahrui leh body temperature thleng thyroid hian a nghawng vek a, kan taksa hnathawh zawng zawng deuhthawah thyroid hian nghawng a nei ti ila kan sawi sual kher lo ang.
Thyroid chuan a nih dan tur anga hna a thawh loh chuan harsatna kan nei thin. Hormone a tihchhuah tlem lutuk chuan hypothyroidism an ti a, kan chauin kan zawi a, kan thau chak a, vawt kan tuar thei lo a, sam a tla nasa a, mood a inthlak thut thut a, ngaihtuahna sawrbing lama harsatna leh brain fog te pawh kan neih phah thei. Chutihrualin hormone a tihchhuah tam leh lutuk chuan hyperthyroidism an ti ve leh thung a. Kan cher telh telh a, anxiety a thlen thei a, kut a khur thei a, zan mutnaa thla tui chhuak vak, lum tih vang pawh ni loin thla a chhuak vak a, lung phu deuh zawih zawih te pawh a thlen thei. Heng symptom te hi thildang vang emaw tia ngaihthah a awl riau a ni.
Chuvangin thyroid chungchanga awareness hi a pawimawh hle a, mi tam takin tyroid problem kan nei tih inhre miah loin, kan lo nei reng thei si a ni. Thyroid health chungchang hi sawi tam a ngai a, hlauthawng leh mangang mai lova a nihna kan hriatthiam a pawimawh. A lanchhuah dan kan hriatthiam a, kan inenkawl vat chuan thil pawi zawk thleng thei tur kan veng thei dawn a ni.
Thyroid hormone hi lungphu (heart rate), blood pressure leh metabolism (kan taksain thau a hman kual vel dan) leh thisenzam hriselna atan a pawimawh avangin thyroid problem reng reng ngaihthah loh tur niin Sir H.N. Reliance Foundation Hospital a Endocrinology & Diabetology Director Dr David Candy chuan a sawi a, tyroid chuchanga hriattur pawimawh a sawi Times of India-in a tarlan te kan rawn chhuah chhawng e.
Thyroid problem chu enkawl a nih loh chuan lung (heart) lam natsa risk a tisang thei a, lung lam fel loh te pawh a neih phah theih a, hypothyroidism emaw hyperthyroidism emaw pawh ni se lung tan a pawi thei ve ve a, a pawi dan erawh a inang lo. Hypothyroidism-ah chuan heart rate a lo muang a, lung a tichak lo a, thisenzamin a tuar leh thin. Hei bakah hian blood lipid level a nghawng a, LDL cholesterol leh triglycerides a tisang thei a, chu chu thisenzamin a tuar thin. BP pawh a nghawng a BP hnuailam (diastolic) a tisang vak thei a, kum upa deuhah phei chuan heart failure te pawh a thlen thei. Hyperthyoidism-ah chuan heart rate a tirang a, lung a tihah a, BP a tisang vak thei a, lungin oxygen a mamawhna a tisang a, tisen luang vel a nih tur aiin a titam vak thei.
Dr David chuan a symptom tlanglawn chu mahni pawha inhriatthiam a, ngaihthat loh nachang te pawh hriat a tul niin a sawi a, “A symptom kan hriatthiam theih tur tlanglawn deuhah chuan palpitation (lung phu deuh zawih zawih), lungphu mumal lo, âwmbawr na vak, a nasat deuh phei chuan heart failure te pawh a ni thei. Kum upa deuhah lungphu mumal lo hi a thlen duh hle a, hyperthyroidism hi enkawl loh chuan stroke leh bolld clot risk a tisang vak thei. Lung lam natna nei tawhsa tan phei chuan natna a tizual vak thei bawk,” a ti.
Heng bakah hian thisen zawmpui zingah thyroid problem nei an awm chuan keini pawh kan fimkur lehzual a ngai tihna a ni a, a chhan hriat tur awm si lo a taksa rihna danglam (cher telh telh emaw thau tawlh tawlh emaw), zawi leh chau deuh ngawih ngawih reng te pawh a symptom a ni thei.
Dr David chuan, “Thyroid chu hriatchhuah hma a, enkawl that chuan heng risk hrang hrang te hi kan tihniam thei a. Thisen test atangin awlsam taka hriat mai theih a ni a, hypothyroidism leh hyperthyroidism te a enkawl dan a inang lo a, mahse, kan enkawl that chuan taksa peng hrang hrangin a tuar tur kan veng thei dawn a ni,” a ti.