Haihawt tan thluak exercise a ngai

Haihawt tan thluak exercise a ngai
Mi hming theihnghilh daih te i ching em? Room-ah i lut a, eng ti tura lut nge i nih tih te i theihnghilh leh daih ngai em? I thil tih lai theihnghilhin thildang tihsan leh daih te i ching em? Ka van haihawt tak ti a mahni tawka nuihna tur hi a tam duh thin khawp mai. Ka buai lutuk a ka haihawt zo tawh a nih hi, tih mai te pawh a awl a, ngaihtuah ka ngah lutuk a ka haihawt phah a nih hi tih te pawh a awl khawp ang. Mahse, hetianga kan haihawt tak viau nachhan hi a awm thin a, kan thluak hriselna lam kan ngaihpawimawh a hun hle tihna te pawh a ni thei thin.
Thluak hriselna chungchang hi kum upat deuh hnua kan buaipui tur chauh emaw kan ti fo a, chutiang a ni lo, kum naupang te te, haihawt tak tak kan tam ta. A symptom hotê chu ngaihthah mai a awlsam a, mi hming theihnghilh leh tlat thin te pawh a pawina em em ka hre kher lo ang. Tunlai khawvel, mitin kan buai em em tawhnaah thil han ngaihtuah thlurbing te pawh a lo harsa deuh a nih pawhin mak kan ti vak lo ang a, tlema kan lo haihawt deuh a nih pawhin thil pangngai ni tura ngaihna neih mai te pawh a awl ang. Mahse, heng thil tê tham a kan ngaih, buaipui zui viau ngai tur pawha kan ngaih loh te hi nakina thil pawi leh tha lo zawk thlen theitu tur bul tanna a lo ni reng thei a, chu vangin thluak lam hriselna thlakchhiat rup hmaa kan lo inenkawl vat hi a pawimawh hle a ni.
Thluak hriselna chungchangah hian awareness kan nei tha lo khawp mai a, lung (heart) hriselna te, thin (liver), kal (kidney) bakah taksa peng leh bung hrang hrang hriselna chungchangah hi chuan inzirtirna pawh kan nei thain, kan hriatna pawh a zau hlawm tawh khawp mai a, chutihrualin thluak hriselna chungchangah hi chuan kan hriat leh ngaihpawimawh dan hi a la hniam ang reng viau si a ni.
Tun tumah hian Amrita Hospital, Faridabad-a Neurology & Stroke Medicine-a senior consultant Dr. Amit Kumar Agarwal-a thukhawchang Times of India-a an tihchhuah te kan rawn chhuah chhawng e.
Dr. Amit chuan, “Ka damlo enkawl ten an sawi thin tlanglawn tak pakhat chu an haihawt thu hi a ni a. Hei hi an kum a lo tam ve deuh tak vang te, an buai lutuk vang te, rilru hah leh ngaihtuah tur an ngah lutuk vang te, TV leh mobile phone an en nasat lutuk vang ni a an hriat thu te an sawi thin. Kan thluak hi kan taksa peng dang ang tho a sawizawi ngai a ni tih kan hre lo fo, nikhatah thluak sawizawina minute 15-20 tiziah thei ila a hlawkna kan hmu thuai mai ang,” a ti.
Dr. Amit-a’n thluak exercise atana tha ni a sawi te chu:
1. Ngaihtuahna sawrbing: Minute 10 vel thuin, i thâwk (breathing) dan kha an ngaithla vang vang la. I ngaihtuahnaah thildang rawn lutin, a kalpeng dawn tihah khan i ngaihtuah ngai, i thâwk dan bawk kha an ngaithla leh vang vang zel ang che. Hei hi prefrontal cortex, kan thluaka thutlukna siam leh ngaihtuahna sawrbing theihna atan a tha.
2. Vawi khata thil tam tak chhinchhiah tum aiin, i chhinchhiah tur chu tlem tlemin thendarh la. Entirnan, phone number chhinchiah i tum khan a number zawng zawng chhinchhiah nghal tum loin phone number digit 10 khan hmun thumah te han then la. Hetianga thluak kan exercise hian kan thil chhinchhiah theihna kan tichak leh thei ang.
3. Vawi khat thil chi hrang hrang tih zir te pawh a pawimawh. Entirnan, kea i kal laiin number a let zawnga chhiar te han tichhian la, inchhung sekrek kawih paha YouTube-a tute titi emaw ngaihthlak a, eng nge an sawi chhianchhiah tum te pawh a tha khawp mai. Hetianga kan thluak kan sawizawi hian tum khata thil pakhat aia tam tih (multitasking) kan awlsam phah thin.
4. Second 30 chhung thlalak emaw, room emaw, chanchinbu emaw han en vang vang a, chutah maimitchhing la, i thil en zawh chiah chu ngaihtuah letin, i mitthlaah an hmu a, i thil hmuh a tam thei ang ber hriatchhuah an tum teh le. A rawng te, a hmun te, thumal te, hmel lo langte pawh a ni thei ang. Hei hi thluak sawizawina tha tak a ni a, visual memory tihchak nan a tha bawk.
5. Thil thar han zir teh. Kan la thiam ngai lo, thil thar zir hi tluak sawizawina tha tak a ni. |awng thar zir emaw, eng hmanrua emaw kan la hmanthiam loh a hman dan zir te leh hnatawh dan kawng thar han zirte pawh a tha hle a ni. Hetianga thil thar kan zir hian kan memory a tichak a, cognitive lama kan tlahniam tur a timuang thei bawk a ni.