I sam a tla nasa em?

Sam a tla naran a awm a, sam tla nasa a awm bawk. A tlak nasat tak tak chuan sam te pawh a lo pan tih kan hre thei thin. I sam i khuihin a hlawm hlawmin a tla a, i zing tho i lukhamah sam a lo tla nuai a nih a, i lu suk zawhah tuipaihnaah sam hlawm a tam hle a nih chuan ngaihthat loh a hun. Sam tla nasa hi hormonal imbalance vang a ni thei.
Hmeichhia thihul dawn lai velin hormonal imbalance hi a awm thin a, hei bakah hian naupai lai leh, thyroid fel lo te, polycystic ovarian syndrome (PCOS) vang te pawhin a awm thei. Progesterone leh estrogen te hi hmeichhe hormone pawimawh tak pahnih a ni a, progesterone chu estrogen level siamthatu a ni. Progesterone a hniam lutuk chuan hyperestrogenism a thlen a, chuvang chuan sam a tla nasa thin. Dihydrotesterone (DHT) pawh hi sam tlak nasat tirtu a ni bawk. Hmeichhiain mipa hormone (androgen) a neih san chuan, testerone level a lo sang a, chu chu DHT-ah a insiam a, sam a titla nasa thin.
Stress vangin sam a tla nasa thei bawk. Hmeichhiain rilru leh taksa lamah stress a neih nasatin a adrenal gland-in cortisol (stress hormone) a lo tichhuak hnem a, chu chuan testosterone leh DHT a lo tisang thei bawk.
Thyroid a active lutuk emaw, a active loh leh lutuk emaw hian sam a tla nasa thei bawk. Hetiangah hian an zawiin, a chhan hriat si lohin an rihna te a pung a, ruhchuktuah te a na a, pumpuar, vun ro te an neih theih bakah vawt an ti thei hle a, zan mut te an harsat thin bawk.
Naupai leh lai nau hrin hnuah hmeichhe hormone a danglam nasa thin a, chu chuan sam a titla nasa duh hle a, hei vang hian nuin nau a hrin hnuah a sam a tla vak thei. Hetiang hi chu a hlauhawm lo a, ama tawkin a lo to ve leh mai dawn a ni.
Hmeichhe thihul tur te hi an sam a tla nasa thin bawk. Menopause laiin estrogen level a lo tlahniam a, chuvangin DTH level nen a in-balance lo thin. Hetia estrogen level a lo hniam hian DHT a lo sang a, chu chuan sam a titla nasa thin.
Nutrient tlakchham vang pawh a ni thei. Heng vitamin S, E leh iron te kan tlakchham hian sam a tla duh hle bawk a ni.
Engtin nge i inenkawl ang?
Omega 3-fatty acid leh omega-6 fatty acid te hi sam tana chaw tha an ni a, heng khawkherh, flax seed, sangha- a bik takin salmon, sardine, herring leh mackerel-ah te pawh a tam a, omega-3 leh omega-6 fatty acid te hi ei tam tur a ni.
Mut that a pawimawh bawk. Kan mut that loh hian stress level a lo sang a, chu chuan cortisol a tichhuak nasa a, sam a titla duh. Zanah kan mut that hian taksa peng hrang hrangin hna an thawk tha a, chu chu sam tan pawh a pawimawh.