Sensitive Bill leh a behbawm….

Mizoram Legislative Assembly 9-na, thutkhawm vawi 6-na kal mekah, nimin February ni 23 khan chief minister Lalduhoma chuan, “Sialkal Range Development Council Bill, 2026” a pu lut a; “sensitive bill” tiin a sawi zui.
Bill ruangam tlangpui: Sialkal Range Development Council hian khua paruk a huam ang; khua pali chu Saitual district leh, khua pahnih chu Champhai district huam chhung ami an ni; khuate hi MLA bial pahnih huam chhunga awm an ni bawk.
2012-ah Congress sawrkarin ‘Sialkal Range Development Board’ tiin bul a tan; 2013-ah Board chu Council tiin thlak a ni. Khua paruka VC-te member-ah an awm nghal. Bul lo tantu sawrkarin Rules emaw, Act emaw siama chei sawrkar vak a duh lo.
MNF hunah, office building hawn a ni a, dan puitling Act hnuaia dah tum a ni a, mahse an dah hman lo.
ZPM sawrkar chuan, sawrkar hmasa draft bill chu innghahnan hmangin tlem tidanglamin tun session-ah an pu lut a. Tunhmaa khua paruka VC te member-a rin nghal chu a thlana inthlan tawh tur a ni a, voter chu MLA electors te hman a ni ang. Elected member-ten CEM an thlang ang a, Executive Member pakhat a awm ang a, member dang pali leh sawrkar nominate member pakhat nen, an vaiin member 7 an ni tawh ang. Official headquarter atan Mimbung a ni ang a, secretary-ah BDO aia hniam lo hman tur a ni.
Bill pu luttu hian Bill sensitive tak a nih thu sawi in, thinlung zau taka indawnsawn tlan a that thu leh, thutlukna inang tlang (consensus) neih pawimawh a tih thu a sawi nghal bawk.
Bill sawi honaah hian member tam zawkin an sawi a, a tawpah Select Committee-a refer an remti tlang a; Bill chu a nihna anga pass a ni ta rih lo a ni.
Bill sensitive a nih dan lam chu lo dah tha ta ila, Sialkal Range Development Council din a nih chhan sawi tlanglawn ber chu ‘development’ thil a ni. Sawi tur a tam ang; mahse, “Engati nge development atana council hran din a tul bik kher?” tih hi zawhna pawimawh tak a ni awm e.
Mizoramah hian mihring nuai 13 vel awm tawh tura chhut a ni a, chumi awmzia chu, MLA pakhat hian chawhrualin mihring singthum vel theuh leh khua 22 vel theuh enkawl ang a ni. State danga deputy commissioner pakhat enkawl pawh zat lo Mizoram mihring hi MLA 40 rualin an enkawl rawn a ni a, chuti chung chuan state Dan pui hmanga a bika enkawl ngai kan la awm cheu tihna a ni a, kan MLA te hi an inbihchian a ngai hle tihna a ni mai lo maw? Hetiang zawnga kan kal a nih chuan, tuna development council Act hnuaia enkawl a ngaihna ang hi Mizoram khawthlang lamah te khuan an tam zawk daih lo maw? Development hmanga inthliarna te a ni thei mai ang em? Rorelna in pui berah ‘a sensitive’ ti chunga put luh a ni a, sensitive na na na chu, tlawmah la lovin Bill hi withdraw ni mai se, chu chu kan that tlanna tur ber a nih a rinawm.