Megan Moroney-i’n No.1 album a nei ve ta

Megan Moroney-i’n No.1 album a nei ve ta
Megan Moroney album ‘Cloud 9’ chu Billboard 200 (US albums) chart No.1-ah a debut a, he chart-a No.1 kai thei album a neih vawi khatna a ni. Hetihrual hian Hilary Duff, Baby Keem leh Mumford & Sons te pawh top 10-ah an lang.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Megan Moroney ‘Cloud 9’ hi kar khat chhungin US-ah 1,47,000 hralhin, chung zinga 78,000 chu album tak tak hralhna a ni a, streaming atangin 69,000 (on-demand official stream maktaduai 71.54)a tling a, album-a hla a mala hralhna chu chhiar tham a ni lo.
‘Cloud 9’ hi Megan Moroney album he chart-a No.1 kai thei hmasa ber niin, a album top 10-a lang thei pahnihna a ni a, 2024 khan “Am I Okay?” chu No.9 kai puiin, 2023-ah ‘Lucky’ No.38 a kaipui tawh bawk.
Bad Bunny “DeBI TiRAR MaS FOToS” chu 85,000 hralh lehin No.1 atangin No.2-ah a tawlh ve leh thung.
Hilary Duff album ‘luck… or something’ chu 84,000 hralhin No.3-ah a debut a, 73,000 chu album tak tak hralhna niin, streaming atangin 11,000 (on-demand official stream maktaduai 11.51) a tling bawk. Kum 10 chuang hnua chart top 10-a a lan lehna hmasa ber a ni. Hilary Duff hian 2015 khan a studio album ‘Breathe In. Breathe Out’ chu No.2-ah a lo debut pui tawh a, chumi hnuah tun hi chart top 10-a a lan lehna hmasa ber a ni. Duff hian a album dang ‘Dignity’ chu 2007 khan No.3 kai pui tawhin, 2005-ah Most Wanted chu No.1 a kaipui a, 2004 khan a self titles album chu No.2 kai puiin, 2003-ah Metamorphosis chu No.1 a kaipui tawh bawk.
Baby Keem album “Ca$ino” chu 72,000 hralhin No.4-ah a debut a, he chart-a a tawn san ber a la ni, “Ca$ino”album hralhna hi 55,000 chu streaming (on-demand official stream maktaduai 56.67) niin, album tak tak hralh chu 16,500 a ni.
Chart No.1 hlui Morgan Wallen “I’m the Problem” chu 71,000 tling lo deuh hralh lehin No.4 atangin No.5-ah a tawlh a, chart No.1 hlui Don Toliver “OCTANE” chu 61,000 hralh lehin No.3 atangin No.6-ah a tawlh a, Olivia Dean ‘The Art of Loving’ chu 61,000 tling lo deuh hralh lehin No.5 atangin No.7-ah a tawlh a, chart No.1 hlui J. Cole ‘The Fall-Off’ chu 53,000 hralh lehin No.2 atangin No.8-ah a tawlh a, No.1 hlui bawk Taylor Swift ‘The Life of a Showgirl’ chu 44,000 hralh lehin No.9-ah bawk a la awm.
Chart top 10 khartu chu Mumford & Sons “Prizefighter’ niin, 44,000 hralhin No.10-ah a debut, he chart top 10-a lang thei album paruk an neihna a ni.