DR Congo-a coltan mine-a lei minah mi 200 thi tawh

Democratic Republic of Congo hmar lama Rubaya-a ruah sur nasa vanga coltan laih chhuahna khura lei mina thi chu mi 200 chuang an ni tawh niin an ram mines ministry chuan a sawi.
Thil laih chhuahna khur thununtu, AFC/M23 hel pawla an hotu lian chuan Reuters hnenah he chhiatna thlengah hian mi panga, paruk vel emaw chauh an thi niin a lo sawi tawh thung.
Thawhlehnia chhiatna thlenna hmun, Rubaya hi khawvela coltan laih chhuah 15% vel laih chhuahna hmun a ni a, an thil laih chhuah hi tantalum-ah an siam chhuak a, mobile phone, computer, van thengrenga zinna hmanrua leh gas turbine siamnaah hman leh thin niin thil sa dang thei metal a ni.
Kum 2024 atanga AFC/M23 hel pawl hnuaia awm he hmun hi tun hnai khan Congo sorkar chuan US nen minerals cooperation framework an siam hnuaia an pek tura a tih (shortlist) zingah a dah nghe nghe.
AFC/M23 hotu dang pakhat chuan, “He hmun chhe tawh hi a himna tur leh lungalhthei laihchhuahna hmuna thawktute tana venhimna dan kalpui a nih hmaa hnathawh tihtawp a nih tawhna hmun zinga mi a ni a. Tun tum chhiatna hi ni eng emaw zat kalta atanga ruah sur nasa vang a ni,” tiin Reuters a hrilh.
Mines ministry chuan thi zingah hian naupang 70 vel an tel tih sawiin hliam tuar tam tak chu Goma khawpuia damdawi inah lak an nih thu a sawi.
Tun tum chhiatna hi January thla tawp lama he hmuna chhiatna dang a thlen hnu thla khat leka thleng leh a ni.