Chanchin Tha thlen Ni champha

March 15 -kha Mizorama Chanchin Tha thlen Ni champha a ni a, Mizoram Presbyterian Kohhran chuan tualchhung kohhran hrang hrangah special programme-ah an hmang.
Kum 2012 Synod Inkhawmpui chuan Rev William Williams-a’n Mizoram a lo luh ni, 1891 March 15 chu ‘Mizorama Chanchin Tha Thlen Ni’ atan a pawm a. Kum 2014 atang khan March 15 chu Mizorama Chanchin Tha thlen ni atan hman a ni ta a. Kumin hi Chanchin Tha thlen atanga kum 135-na a ni. Kuminah hian Chanchin Tha thlen ni hi Pathianni a nih avangin programme tum hnih – chawhnu leh zan atan siam a ni.
Mizorama Chanchin Tha thlen ni atana hman March 15 hi Mizorama Chanchin Tha rawn puang hmasa bertu Rev. William Williams-a’n Mizoram a rawn thlen ni champha a ni a. Rev. William Williams hi Khasi rama Welsh missionary a ni. Mizote chanchin a hriatin Mizo zinga Chanchin Tha hril a duh hle a, Mizo zingah missionary ni tura a lo kal thei lo chungin, Mizoram tlawh hram a tum a, Silchar deputy commissioner remruatpuina in sipai ho ruala lokalin Mizoram a rawn lut a, a hmasa ber atan Mizote zingah Krista Chanchin Tha a rawn puang a ni.
Hei vang hian Rev. William Williams-a’n Mizoram a rawn thlen ni hi Mizoram Presbyterian Kohhran chuan Mizorama Chanchin Tha Thlen Ni atan a hmang ta a ni.