Hamas-in a thenawm ramte bei lo turin Iran ngen

Iran nena inzawm Palestinian firfiak pawl, Hamas chuan Iran chu a thenawm ramte beih lo turin an ngen a, hetihlai hian Tehran chuan US-Israeli beihna chhang let turin dikna a nei tih a sawi.
Hamas hian Iran kal dan chungchangah vantlang hmaa thu an sawi vawi khatna a ni a. Indona kal mekah hian Iran nen an thlawp thu a sawi a; mahse, tun thlengin phuba lakna lam hawi engmah a la sawi lo.
“Kan pawl hian Iran-in khawvel kalphung leh dan angin tih dan hrang hrang hmanga beihna chhan let theihna tur dikna a neih laiin Iran-a kan unaute chu thenawm ramte beih lo turin a ngen a ni,” a ti.
Middle East-a ram zawng zawng leh khawvel huap pawlte chu indona titawp turin an ngen bawk.
Israel leh Hamas hi Gaza-ah October thla atang khan inkahhai an remti a, tharum thawhna erawh a chhuak zui reng a. Iran nena an indona tan tirh khan Israel-in Gaza-a tharum an thawh a tlakhniam laiin tunah chuan a pung leh tan tawh.
Hetihlai hian Lebanon-a Iran nena inzawm Hezbollah chuan indo tan tirha Iran supreme leader thah phuba lak tumin March 2 khan Israel lakah silai an hmetpuak tan a. Israel-in chhang let ve nghalin Lebanon hi a bei zui a, hel pawl hi a bitum zui mek.
Yemen-a Iran nena inzawm, Houthi-te pawhin Gaza indo lai khan Tuipui Sen-a Israel nena inzawm nia an hriat lawngte lakah beihpui thlakna an kalpui a, Tehran nena an inlungrualna nghet tak an lantir bawk. Beihpui thlak leh turin an la vau lo thung.