Bengal-ah TMC-in candidate puang, Assam bial 89-ah BJP
Bengal-ah TMC-in candidate puang, Assam bial 89-ah BJP
Thla leha state assembly inthlan tur atan boruak a inmung mek zel a. West Bengal-ah chuan rorel lai, Trinamool Congress chuan Thawhlehni khan an candidate-te hming an puang a. Hetih lai hian Assam-ah rorel lai, BJP chuan bial 89 chuhin an thawhpui dangten bial 37-ah candidate an dah ve thung dawn niin Chief Minister Himanta Biswa Sarma chuan a sawi.
Bengal-ah hian Mamata Banerjee-i kaihhruai party hian an state-a assembly bial 294 awma 291-ah an chuh dawn a, TMC supremo hian tuna a bial, Kolkata-a Bhabanipur atangin a chuh leh ang.
West Bengal chief minister leh BJP hruaitu, Suvendu Adhikari inkara inbeihna a awmtir thei dawn a, kum 2021 khan Nandigram-ah Banerjee-i hi a hneh a, Bhabanipur-a byelection-ah hnehna changin rorelna inah a luh theih phah.
TMC hian seat 291 a chuh dawn a, Darjeeling tlangrama bial pathum erawh Anit Thapa kaihhruai Bharatiya Gorkha Prajatantrik Morcha (BGPM)-in an chuh dawn a ni.
Inthlana ding tur candidate list a tihchhuahah Banerjee-i chuan TMC-in thuneihna a chan leh ngei a rin thu a sawi a, “Kum 2026 assembly inthlanah seat 226 chuang kan la thei dawn a ni,” a ti.
Assam Chief Minister Sarma chuan Thawhlehni khan BJP chuan Nilainia an party parliamentary board thutkhawm neih zawhah an candidate-te hming an puan tur thu Thawhlehni zan khan a sawi.
“BJP inthlanpui committee thutkhawmah hian BJP list bakah seat insem dan tur pawh kan thawhpuite nen kan sawiho dawn a, BJP central parliamentary committee chu Nilaini tlaiah an thukhawm dawn a, hemi hnu hian zanah emaw, Ningani zing emaw list hi kan tichhuak ang,” tiin Sarma chuan Thawhlehni-a an thutkhawm zawha thuthar lakhawmtute hmaah a sawi.
Sarma chuan kum 2016 atanga an state-a thuneihna chang tawh BJP chuan seat 126 zinga 89-ah candidate a dah dawn tih sawiin, seat 26 chu an thawhpui, Asom Gana Parishad (AGP) tan an dah dawn a, a bak 11 chu Bodoland People’s Front (BPF) tan dah a ni dawn tih a sawi.
Assam-ah hian bil 126 awm zawng zawng hi April 9-ah thawh khatin vote thlak a ni dawn a, May 4-ah chhiar a ni ang.