TAMIL INTHLAN:Eptu AIADMK-in candidate tur 23 puang

Eptu, All India Anna Dravida Munnetra Kazhagam (AIADMK) chuan April 23-a Tamil Nadu assembly inthlanpui neih turah an candidate tur an puang tan a, an puan hmasak berah hian hming 23 an tar lang a. Edappadi bialah General Secretary Edappadi K Palaniswami an dintir ang.
A hmain bial 169-ah an chuh dawn tih an puang bawk a, National Democratic Alliance (NDA)-a an tanpui pawl dangten bial 65-ah an chuh dawn tih an puang bawk.
BJP-in bial 27 atangin an chuh dawn a, Pattali Makkal Katchi (PMK) chu bial 18-ah an ding ang a, Amma Makkal Munnetra Kazhagam (AMMK)-in bial 11 an chuh ang a, Tamil Manilaa Congress (TMC)-in bial nga an chuh thung ang.
Party tenau, Indhiya Jananayaka Katchi (IJK)-in bial hnih an chuh dawn a, Tamilaga Makkal Munnetra Kazhagam (TMMK) leh Puratchi Bharatham ten bial khat ve ve an chang dawn.
AIADMK-in an candidate tur an puan hmasak ber hi assembly inthlanpui atana point 297 awmna election manifesto an puan hnu tukah an tichhuak a. Manifestor-ah hian state chhunga hmeichhe pakhat tan thla tin allowance Rs. 2,000 pek a nih tur thu leh chhungkaw pakhat tan vawi khat Rs. 10,000 chhawmdawlna pek a nih tur thu an tar lang.
Manifesto-ah hian ration-ah thil dang sem tel an tiam bawk a, buhfai bakah dal, ration card neitute tan refrigerator sem leh kum khatah cooking gas cylinder pathum a thlawna pek an tiam a. Mipa tan pawh bus-a a thlawna kal theihna a tiam a, hmeichhia tan hei hi a thlawna hman theih a ni sa thung.
Palaniswami-a hi EPS tia hriat lar a ni a, kum 2017 atanga 2021 thleng khan Tamil Nadu chief minister pasarihna a ni a. Kum 71 mi, assembly-a eptu hruaitu hian kum 2011 atang khan Edappadi bialah thlan tlin a ni a, a hmain kum 1989 atanga 1996 thleng khan a lo bial tawh bawk a. Salem district-a piang, Palaniswami-a hi agrarian chhungkaw atanga piang niin lo neitu a nih thu a insawi thin.
AIADMK Deputy General Secretary K P Munusamy-a chu Veppanahalli-ah a ding dawn . Kum 2011 atanga 2016 thleng khan J Jayalalithaa cabinet-ah municipal administration leh rural development minister a ni tawh a, party Rajya Sabha MP (2020–2021) lo ni tawhin kum 2021 khan state assembly-a thu turin thlan tlin a ni.
Minister hlui leh assembly speaker hlui, D Jayakumar-a chu kum 1991, 2001, 2006, 2011 leh 2016-a thlan tlin a nihna, a pianna, Royapuram-ah a ding dawn a, kum 2021 inthlanah khan a tling zo lo va, tunah hian AIADMK organizing secretary a ni mek.
Party Rajya Sabha MP C V Shanmugam, MLA vawi li ni tawh, kum 2003 leh 2006 leh kum 2011 leh 2013 inkarah education, law leh commercial taxes minister lo ni tawh chu Mailam-ah a ding ang.
Health minister hlui, C Vijayabaskar chuan Viralimalai bialah a chuh dawn a. Dindigul C Sreenivasan, party treasurer, kum 2016 atanga 2021 thlenga forests minister lo ni tawh chu Dindigul-ah a ding ang.
Lemchan thiam, politic-a lut ta, Vijay-a chuan Tamil Nadu-ah hian TVK hmangin inthlan a chuh dawn a, inthlan lo awm tur chu kil thum inbeihna a nih hmel.
Rorel lai tangrual erawh chuan candidate tur leh manifesto an la puang lo.