Sawrkar thawhpui tum Vantara ringhlel

Mizoram sawrkar thawhpui tuma aiawh rawn intir mek Vantara chu an ringhlel a, Forest department pawhin an thawhpui duh tawh loh a nih avangin inbun tir loh nise an duh tih environment humhalhtu pawl CESJ chuan an sawi.Centre for Environment & Social Justice thuchhuak chuan, Rural Development leh PHE changtu minister Prof. Lalnilawma chuan tunhnai khan a social media account-ah Vantara atangin Greens Zoological, Rescue & Rehabilitation Centre director Dr Brij Kishor Gupta hoin Mizoram leilung leh boruak mil tura hmalakna tur ruahmanna (action plan) – nature reserve, afforestation, tui hna tih pun leh community reserve chungchang a office-ah an sawiho a, OSD to CM Jonathan Lalremruata’n an tawiawm, tih thu a ziak niin a sawi.
Vantara hi Reliance Industries Limited (RIL) hotupa Mukesh Ambani fapa, Anant Ambani private zoo (Wildlife Rescue & Conservation Centre) Gujarat state-a Reliance Oil Refinery – Jamnagar bula awm a ni, tiin, he hmun hian a tha lo zawngin hminghliauna a ngah a, a bikin ramsa, sava danglam leh vang tak tak ‘exotic species’ an tih, khawvel hmun hrang hrang atanga dan pawisa loa an mimal ennawm huanga dah tura an lakkhawm thin vang a ni pakhat tih a sawi a ni.
‘Hei hian wildlife conservation lama mithiam leh thahnemngaite dodal leh sawisel a hlawh nasa a. Court-ah pawh khin an ni hial. Amaherawh chu, Ambani chhungkua hi Asia-a hausa ber, politics, media leh bureaucracy a phungbawm ngah tak an ni a. An sum leh pai thiltitheihna hmachhuanin India sawrkar thuneitute policy tam tak hi an company hlawkna turin an her danglam thei hial thin,’ a ti a. Heng hi India rama natural gas reserve lian ber nia sawi Krishna- Godavari Basin a gas lakchhuahna tura scam lian tak awm nia lang leh sawrkar agency, ONGC gas khur ami Reliance-in a lo divert-a puhna thubuai an neih dan report-ah pawh a hmuh theih tih a sawi Ambani ang bawka India sawrkar hotute nena inhne hnai tak Adani Company pawh mizoram chhim lama hydro power project Mw 500 siamna tur tender mumal pawh a awm em ni, tia zawhna a awm mek laiin an lo hmu fel der tawh tih CESJ hian sawiin, an ni company hi Australia-ah chuan kum 2017 vel khan environmental laws nasa taka bawhchhiaa tuipui tibawlhhlawha puh a nih vangin court-in sum tam tak a lo chawitir tawh an nih bakah tunah US lamah India rama solar energy contract lian ho hmuh an duh luat vanga thamna vaibelchhe 2000 chuang hu sawrkar official leh thuineitute pea puhna corruption case an nei mek tih a sawi a ni.
Chutih laia kan state sawrkara minister, mithiama ngaih meuhin Mizoram nungcha leh ramngaw humhalhna tura an thurawn la a, Reliance Foundation enkawl Vantara thawhpui an tum chuan a barakhaih hle tih sawiin, ‘Helam kaihhnawih department EF &CC hotute hian Vantara hi an hrechiang a, conservation lam chungchanga thawhpui tlak lohah an ngaih vangin a department chan nena inrem luttuk lo minister nen suihrem tumin OSD to CM hian hma a la kual ta zawk nge tih hi zawhna a ni,’ a ti.
Vantara hi nikum lamah Arunachal Pradesh leh Assam vela sai (elephant) engemawzat an private zoo-a dah tura phur chhuakin sawrkar thuneitu thenkhat nen dan pawisa loa an thawh ho thu ram dang environmentalist thenkhatin an tarlang nasa tih CESJ hian sawiin, Aizawl Zoo dinhmun tha lo leh funding indaihlohna nasa tak karah dan loa ramsa tawlhruk ‘exotic species’ an man khawm dah lailawk leh enkawl zuina atan an hman loh theih loh, mak tak taka bo ta fo te kha Vantara lamah hian an lo thleng thla daih a ni lo maw tih thlengin CESJ chuan ngahdan a lo nei tawh a. RTI dan hmanga an lo zawh tawh bakah FIR pawh an lo thehlut tawh tih a sawi a ni.
Heng company lian pui pui hian kan ramngaw, nungcha leh mineral resources awm hi a ram leilung fate tawrh theihna tur ngaihtuah loin, an hlawkna leh pum puarna ringawt zawnga sumdawnga rawn khawih chhiat an pawisa dawn lo tih hi, sawrkar leh mipui nawlpuiin kan hriat a tul takzet tih sawiin, ‘Hetiang hi Central India tribal/ adivasi ho khawsakna hmun leh ramngaw an lo nghaisak tawh danah chiang takin a lang a. Eng ber nge kan ramah an duh tih chik taka kan ngaihtuah a, inven lawk a tul. Kan ram leilung, ngaw, nungcha leh lui tui thui takin a khawih pawi thei dawn nia kan hriat avangin CESJ chuan nasa takin kan dodal zel dawn a. Sawrkar pawh he thawhhona hi chhunzawm lo turin kan phut a ni,’ a ti.