Ward 19-a inthlan turah chuh tur 68

Aizawl Municipal Corporation inthlanpui neih turah ward 19 awm atangin chuh tuma hming pe lut 68 an awm a, political party behchhan nei vek an ni.
Kumin April 21-a AMC inthlan turah hian Thawhtanni, March 30 chawhnu dar 3.00 kha candidate nih tuma nomination paper thehlut tan inhnukdawh leh theih hun tawp a ni a, hemi chhung hian nomination file mi 68 zingah inhnukdawk an awm lo.
Party pathum – Indian National Congress, Mizo National Front leh Zoram People’s Movement chuan ward awm zawng zawng – 19 an chuh vek dawn a, Bharatiya Janata Party-in ward 11 an chuh a, a vaiin candidate 68 an awm a ni.
Ward paruk – II, IV, V, XI, XII leh XVII hi tun tum inthlanpuiah hian hmeichhe tana hauh bik ward a ni a. Chutihrualin hmeichhe tana hauh bik ni loah party-ten hmeichhe candidate neihna an nei tho. Candidate 68 zingah 27 hi hmeichhia an ni a, mipa 41 an awm.
Hetihlai hian district municipal election officer Aizawl, bawrhsap Er. Lalhriatpuia kaihhruaiin AMC 2026 inthlana election official tur – municipal returning officers, assistant MROs leh nodal officers ho chuan Thawhtanni khan an inpuahchah dan an thlirho a. Official-te hian an mawhphurhna theuha hma an lak tawhna leh hmachhawp an report a ni.