US MotoGP-ah pawh Bezzecchi bawk!

Season kal laia a vawi thumna atan Italian rider Marco Bezzecchi chuan United States Grand Prix-ah hnehna chang lehin, kum 2014-a bul tan fuh Marc Marquez hnu lama season tir lam race hmasa pathuma chak fai vek thei hmasaber a ni.
Intlansiak hmasa pahnih Thailand leh Brazil-a hnehna chang ve ve tawh Aprilia rider Bezzecchi hian Texas khawpui Austin-a Circuit of the Americas-ah opening lap atangin hma a hruai leh nghal chat a, kha ta tang khan hawikir leh eih tawh loin a hmahruaina a keng tlang zak!
Season liamtaa intlansiak hnuhnung pahnihah pawh khan lawmman semna dawhsan chung ber ve ve luahin, kumina tum thum a chak leh tawh nen a zawnin kum 27 mi hian MotoGP race vawi nga zet a chak tling ta a; a zawna lap hmahruai tam ber (121) MotoGP record siam bawkin, kum 2015 daih tawha lap 103 chhung hmahruaitu ni tling thei Jorge Lorenzo record a khum ta a ni.
A chetsual avanga Inrinni sprint race-a tlan chhuak zo lo Bezzecchi chuan a tuk Pathianni Austin tlankawnga race tak tak zawk hnehna a sualchhuah leh hnuah a hlim em em tih sawi chungin, “Nimin khan tihsual ka nei pek a, vawiina race tha tak ka hlenchhuak leh thei ta hi a pawimawh hle a ni,” a ti.
Bezzecchi team-mate Jorge Martin chuan Inrinni sprint race-ah hnehna changin, Pathianniah erawh Italian rider ngam loin pahnihna a luah a; pathumna chu Red Bull KTM rider Pedro Acosta niin, defending champion Marc Marquez chu pangana a ni pha hram.
Bezzecchi hian race vawi thum tlan tawhah point 81 hum chungin MotoGP standing-ah hma hruai bawk mah se amah hnaihbertu leh a team-mate ni bawk Martin lakah point li lekin a sang a, Aprilia Racing rider pahnihte hi an inthlau tha duh dawn lo niin a lang!
MotoGP season kal laia next round hi April ni 24-26 chhung khian Jerez, Spain-ah an chhunzawm leh dawn a ni.