Chhiarpui 2027 bultanna kalpui tan

Chhiarpui 2027 bultanna kalpui tan
India ram Chhiarpui 2027 neih tumah Mizorama bultanna chu Nilaini khan tanin, chief minister bakah minister pahnih chu mahni inchhiar/ inziahluh theihna tih sak an ni.
Census of India 2027 hi thuang hniha kalpui a ni dawn a. Thawhkhatnaah houselisting leh housing census tih niin, online portal hmanga mahni inchhiar /inziahluh theihna – self enumeration (SE) tih hmasak a ni anga, April 1-15 inkar hian Mizoram pumah kalpui tum a ni.
Self enumeration bultanna atan chief minister Lalduhoma bakah minister pahnih – K Sapdanga leh Vanlalthlana te chu Nilaini zing khan an chenna inah thawktuten kalchilhin an tih pui a ni.
Mahnia inziahluh hi in tina kal ngai, enumerator-te hna tam takin a chhawk zangkhai dawn bakah awlsam takin hun seng tlem zawkin chhiarpui kalpui a ni dawn tih thawktute chuan sawiin, mipui tam zawkin ti thei se an duh tih Census hotute chuan an sawi.
Thawh hnihna, population enumeration hi February 2027-ah neih tan tur a ni a. Tun tum census hi digital hmanga census kalpui hmasak ber tur a ni dawn a. SE hi April 15 thleng, SE ti lo tan April 16 atanga May 15 hian in tinah kalin enumerator-te hian house listing leh housing census hi an ti dawn a ni.
Mahnia inziaklut tur (self enumeration) tan official portal (se.census.gov.in) ah mobile phone/ computer hmangin engtik lai (darkar 24) pawha inziahluh theih a ni a, inchhungkhur pakhat atangin mi pakhatin a inziah luh theih. Form thehluh hnuah self enumeration ID (SE ID) a lo chhuak (generate) anga, hei hi enumerator-te an lokal hunah lo pek tur a ni.