Tuiluankawr bawk hi….

Lunglei West bialtu MLA chuan Lunglei khawpui chhunga tuihawk kawng bo, tuiluankawra luan luhtir tura hma lak rum rum a har dawn tih tunhnai khan a sawi a. Tuiluankawrah PHED connection pipe eng emaw zat a awm avangin a siam that kawngah pawh PHE department te nen inthuruala hma lak a tul thu a sawi a. Lunglei khawpui chhunga tuiluankawrte chu awmze nei leh tha zawka siam that vek a ngai a, LMC, PWD, UD&PA leh PHE department te an tanrual a ngai niin a sawi bawk a.
Mizoramah hian, hmun tin deuhthaw-ah, tuiluankawr (drainage system) kan neih that loh thu kan auchhuahpui chuah chuah thin. Tuiluankawr tha a awm loh avanga fur laia tuihawkin luan ngaihna hre lova kawngpui dung a zawh thin thu te, tuihawk avanga kawngpui a chhiat hma thu te, tuiluankawr mumal loh avanga leimin a tam thin thu te, fur laia leimin avanga chenna in a chhiat thu te, silpaulin semchhuah bak tihngaihna vak a awm loh thute kum tin sawi chhuah a ni thin. Tuiluankawr tha neih a tulzia leh a pawimawhzia hi chu kan hre thawkhat a; mahse, tuiluankawr tha kan nei thei chuang lo lai tak hi ‘a manganthlakna’ lai tak chu a ni.
Lungleiah chauh pawh a ni awm lo ve, Mizoram hmun hrang hrangah pawh hian, tuiluankawra tui connection pipe inkawkalh thlur seng sung hi hmuh tur a awm chawk thin a, chutiang bawkin kawngpui chhuat hnuaia tui pipe inphum thenkhat pawh, awmze nei (systematic) taka siam hi a tam lo hle niin a lang. Hetah hian a kaihhnawih deptt (PWD, PHE , UD&PA etc) te an tanrual a pawimawhzia hi sawi tam ngai lovin a lo lang mai awm e.
Kawngpui chhiat hma chhan nia sawi thin hi, ‘tuiluankawr mumal loh vang’ tih a ni deuh ber a. Kawngpui siam dan quality-in duhthu a sam thin loh avanga kawngpui tha kan nei rei thei lo kan tih tawh lai a, kawngpui tichhetu hmelma lian ber pakhat ‘tuihawk’ kan la khuahkhirh thei lo lehzel hi chu, kawngpui tha neih rei ngaihna a awm lo reng a ni.
Fur a lo thlen apianga tuiluankawr tha kan mamawh thu kan sawi thinna hi a rei ta ngar ngar hle a, tuiluankawr tha siam thei sawrkar hi Mizoram hian a la hrawn lo a nih hmel. Tuna sawrkar mek pawh hi eng ruai a ang bik dawn lo em ni ang?