Fury kir lehin Joshua lam hawi zui nghal!

Fury kir lehin Joshua lam hawi zui nghal!
Professional boxing a chawlhsan zet hnua hruihrual chhunga kirleh tura thutlukna a siam nawn leh vawi nganaah Briton palian Tyson Fury chuan a comeback fight dawtleh atan a chipui Anthony Joshua ngei mai ni se a duh tih a sawi chhuak.
Kum 37 mi Fury hian a heavyweight comeback-ah Inrinni hian London khuaa Tottenham Hotspur Stadium-ah Russian fighter Arslanbek Makhmudov a hnek dawn a, hei hi thla 16 liamta chhunga a inhnek leh vawi khatna tur chiah a ni.
British heavyweight boxer pahnih Fury leh Joshua hi inhnek tura sawizawm ni kumkhua mah se intawng lo zawngin an intawklawi leh thin a, chhuan khat zet an nghah hnuah all-British super-fight beiseina a nung thar leh mek a, kumin hian a tak ram thleng zo tawh tak ang maw?!
Fury chuan he mi chungchang hi sawiin, “A tak a chang zo a nih chuan a ropui ngawt ang a, a puitling zo leh lo a nih pawhin a pui tho ang. Inrinni zan hian Arslanbek Makhmudov ka hmachhawn phawt ang a, a dawtleh atan Joshua ngei mai hi hmachhawn ka duh a ni,” a ti.
Nikum December thla kha kum 36-a upa Joshua inhnek tawpna ni rihin, round ruknaah Jake Paul a knock out a; kha mi hnu khan Fury nena inhmachhawn zui turin ruahmanna pawh a kal tluang hle nia a lan laiin nikum kum tawp lam khan Nigeria rama car chesualah Joshua hi a damkhawchhuak hram a, a chuanpui thian hnaivai pahnih phei chu an thi nghe nghe a nih kha!
North London lama kartawp inhnekah hian hruihrual sir hnai tak atanga Fury inhnek en turin Joshua pawh Spurs stadium-a a luh ngei rin a ni a; Fury nena sawizawm a nih leh tak chungchangah promoter lar Eddie Hearn chuan Watford-born fighter Joshua hi training tura a kir hnaih a beisei thu a sawi ve tawh bawk.
‘Gypsy King’ tia hminglem nei Tyson Fury hian a career-a professional fight tum 37 a paltlang tawhah vawi 34 chakin, vawi hnih a tlawm a, draw tum khat a nei tawh bawk.
Morecambe fighter Fury hi world champion Oleksandr Usyk laka a tlawm zawn hnu khan hruihrual chhungah a la inhnek leh ta lo a; December 2022 daih tawha Derek Chisora a hneh kha Britain leilunga a inhnek tawpna a ni tawh bawk.
Tunhnai khan Thailand ramah training a han kalpui zuai a, chu chuan boxing a la ngainatzia leh tih takzeta kirleh a tumzia a pholang chiang niin a lang!