An mualah Barcelona an chak lo

Nilai zan khan UEFA Champions League quarter-final thawhkhatna khelh chhunzawm a ni a, FC Barcelona chu Nou Camp-a an mikhual Atletico Madrid lakah si hnih faiin an tlawm. An mualah Barcelona an tlawm laiin champion lai Paris St-Germain chuan an mikhual Liverpool chu 2-0 in an lo hneh ve thung.
Barca kawng daltu Atletico Madrid
La Liga lama hmahruai mek, La Liga-a Atletico Madrid in an ngam loh thin tak Barcelona in season kal meka inelna dangah Atletico Madrid an ngam lo leh tlat thin. Atletico Madrid hian Spanish Copa del Rey atangin Barcelona hi an lo hnawtchhuak tawh a, Champions League atanga hnawtchhuak thei dinhmunah an ding leh mek bawk. UCL atanga an hnawtchhuak leh a nih ngat chuan season kal meka Barcelona kawng daltu lian ber an ni ang.
Barcelona hian an mikhual Atletico Madrid lakah an khel tha a, goal an thun hmasa teuh thei viau. A sir lamah Marcus Rashford a hlauhawm viau a, goal a thun teuh thei hle a. Ball thiam bik tura duan Lamine Yamal pawh a hmuhnawmin, a hlauhawm thei viau bawk. Khel tha viau mah se goal erawh an thun thei lo thung.
Derthawng zawka tang deuh reng Atletico Madrid in fuh zetin an nawr tlang thut a, goal thun theihna hun tha an nei. Barcelona defender Pau Cubarsi chuan Istvan Kovacs a titlu a,frees kick a chawi bakah redcard a hmu a, hnawhchhuah a ni. Arsenal in lak tuma an hel mek Julian Alvarez chuan free-kick hi tawih zetin top corner-ah a pet goal a, chawlhlawk dawn hnaih minute 45-naah hmahruaina goal a thun. Alvaraz goal thun hmang hian Atletico Madrid in 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, tlem zawk ni chunga si phur Barcelona in an khel tha hle. Tlem zawk an nih lang lo khawpin an khingpuite an nawr a, Marcus Rashford chuan free-kick atangin goal a thun teuh hle a, goal bar a pet per dawp.
Inkhel hmuhnawm takah goal lut a awm belh theih lih reng hnuin mikhual team Atletico Madrid an che fuh nawn leh. Alexander Sorloth chuan rang zeta pet goa in a hun tha neih a chhawr tangkai a, minute 75-naah an goal hnihna thunin, an hmahruaina a tizau. Barca hian hun tawp thlengin an si phurh an sut thei lova, an mualah ngei Atletico Madrid hneh lovin an tlawm a. Atletico Madrid hian kum 2006 hnu lama a vawi khat nan Barcelona mualah hnehna an chang ve leh ta nawlh a ni.
PSG an chak
Champion lai Paris St-Germain chuan Parc de Princes-a an mikhual Liverpool lakah nghet tha takin a khel a, phu takin hnehna an chang. PSG hian Liverpool lakah bul an tan tha viau a, inkhel tan atanga minute 10-na lekah Désiré Doué chuan hmahruaina goal a thun nghal. Hma takah goal an thun hnuin goal lut a awm belh thei lo reng a. Minute 65-naah EPL club te pawhin an hmuhtaih em em Khvicha Kvaratskhelia chuan goal thun belh leh ta a ni.