Sia pasal then man a to

Cheap Thrills’ kha kan la hria ang chu maw, a pasal nena an inthen man erawh a to ve talh. An fapa, thla thara kum hnih tling ve tawh mai tur, Somersault Wonder Bernad enkawltu zawkah a pasal then tak Daniel Bernad a tang tlat mai si a, an fapa enkawl nan a pasal hlui hnenah hian thla tin dollar 42,500 pe ziah turin court-in a ti mauh mai. A fapain kum a tlin hma chuan a sum pek tur hi thla tin a pek char char a ngai dawn a ni.
Hemi chungchang hi Sia hian X-ah post-in, “Zalenna lei tuma harhfim kara nutling hnathawk ka nia. Kumin hi ka tan kum sakei te pawh a tih theih ang a, mahse, hun khirh leh harsa paltlang a, midang ngaihdan tur dawn aia chhungkaw lam ngaihpawimawh hmasak pawimawhna te min zirtir a nih hi,” a ti.
Sia, kum 50, hian child support atana thla tin dollar 42,500 a pek bakah a fapa private school tuition, health insurance leh extracurricular activity senso te pawh a tum vek a ngai dawn niin court document-ah chuan an tarlang a, hei bakah hian life insurance policy dollar maktaduai 5 man lain, a beneficiary-ah a fapa Somersault a dah tur a ni a, hei hi a fapa puitlin hmaa a lo boralsan a nih pawha a lo intunnun nana an tih a ni.
Sia leh Daniel Bernad te hi 2022 khan an innei a, an inneih hmain Sia hian midang lakah fa pahni a nei tawh bawk. March 2025 khan Sia hian court-ah inten dilna a theh lut a ni. Daniel nen an inthen hian an fapa enkawltu zawk an inchuh nghal a, court chuan an fapa chunga thuneihna inang nei turin a ti a, Daniel bulah an fapa hi a awm tam zawk dawn a, chutihrualin chawlh (holiday) ah chuan an inawm chhawk dawn a, Sia hian Mother’s Day, Easter leh Krismas-ah te a chang dawn a, Daniel hian Father’s Day, Halloween, Passover, Rosh Hashanah, Yom Kippur leh Hanukkah-ah te a chang ve thung ang.
Daniel hi radiation oncologist thin a ni a, ani hian spousal support atan thla khatah dollar 2,50,856 a phut ve thung a, hei hi an inneih chhunga nun nuamsa zawk a lo chen ve tawh avangin chutiang nun chu a neih chhunzawm zel theih nana a ‘demand’ a ni! Hei bakah hian Sia chu ruihhlo khawih thinah puhin, an fapa enkawltu a nih chuan an fapa tan a tha lo zawk dawn niin court-ah hian tan a khawh ve thung a ni.