Mizo tawng ziah dan: Grassroot level a\angin
Mizo Language Development Board thutkhawm vawi 5-na tun hnaia neih chuan, Sap tawng leh Hindi tawng, Mizo tawng ang maia kan hman zui tak thumal 131 chu a sipel Mizo tawnga ziaha Mizo tawnga pawm ni se a ti a. Sap tawng (science lam) thumal Mizo tawnga sengluh atana rawtna lut, Mizo |awng Zempui Kawmiti thu pawh MLDB hian pawmsak a rel bawk.
MLDB hi kan hma lawk May thla hian kum thuma upa a lo ni ve dawn ta reng mai. |awng chungchangah hian hmalakna tur a tam ang a, zir chian ngai a tam dawn avangin tihfel zung zung theih pawh a ni rih lo maithei e. Tihfel hmasak atana pawimawh a awm rualin, han nghah deuh tul pawh a awm bawk ang.
Hetih rual hian, tawng ziah dan chungchangah chinfel hmasak ngai lianpui a awm niin a lang a, chu chu ‘tawng ziah dan’ chungchang hi a ni. Tun dinhmunah chuan, Mizoram Board of School Education hnuaia Mizo Language Committee(MLC)-in tawng ziah dan lehkhabu a buatsaih “Mizo |awng Ziah Dan” tih a awm a, vawi li zet ennawna chhut that a ni tawh nghe nghe. He lehkhabu behchhan hian Mizo Academy of Letters pawhin ‘Book of the Year’ a thlang thin.
Mizo Language Committee hi tawng chungchanga ‘a dik ber’ ti theitu a ni lo a; mahse, tunah chuan Mizo Language Development Board Act, 2022 hnuaiah Mizo Language Development Board Rules, 2023 hial kan nei tawh a, “Ni chu ni, ni lo chu ni lo” ti theitu thuneitu sang ber chu MLDB hi a lo ni ta a ni.
Tun hma atang tawhin Mizo tawng ziah dan chungchangah kan mithiam zingah ‘hei hi a dik zawk’ tia inhnialna a tam em em a, a thelh theitu ‘thuneitu’ a awm loh avangin Mizo tawng ziah dan pawh a inang lo zeng zung a. Zirlaibuah lah ni se, ‘kei ka ni’ inti ve thei chinte thuziak, ziah dan inang lo nuaih mai chu zirlaiten an zir a, a dik ber an hre lo.
Tunah hian zirlaite hian a grassroot level (foundational stage) atanga tawng ziah dan dik hi an thanhnan a pawimawh em em a, chutiang tur chuan elementary stage atang hian Mizo tawng zirlaibute hi ziah dan inang tlang veka dah a tul tawh. MLDB hian MLC lehkhabu hi a pawm a nih chuan official takin puangzar mai se, chumi behchhan chuan zirlaibu zawng zawng hi siam that ni se, chuti chuan zirlaite hian Mizo tawng ziah dan hi an thanhnan thei ang a, tun atanga thangkhat lianah chuan tawng ziah danah ‘uniformity’ a piang tawh ang a, kan buai tawh lovang.