Villa in Semi-final an hnaih

Ningani zan khan UEFA Europa League quarter-final thawhkhatna khelh chhunzawm a ni a, Mimualah 3-1 ngawta hnehna an chan vangin Aston Villa in semi-final an hnaih. Mimualah chak zo lo mah se own goal vanga tlawm an pumpelh vangin Nottingham Forrest pawhin semi-final luh theihna hun tha tak an nei ve bawk.
Aston Villa 3-1 Bologna
English Premier League (EPL) ah palina luah mektu Aston Villa chu Italian Serie A-ah pariatna ni mek Bologna hmachhawn turin Italy-a an zin a, Renato Dall’Ara-ah an lenglut. Mikhual an nihna hmunah harsatna an tawh mai a hlauhthawnawm viau laiin mar tha takin an khel a, 3-1 ngawtin hnehna an chang.
Serie A club Bologna leh Aston Villa te hian inhnehawk takin bul an tan a, goal pawh a lut har hle. Mualneitu lamain bul an tan tha a, goal thun theihna hun tha an neih chu si nghak Emiliano Martinez-a’n a tihthlawnsak. An hun tha neih an hlah hnuin Bologna hian goal an thun. VAR rawn a nih hnuin offside vangin goal hi hnawl a ni a, Villa an him nawn leh. Goal hi pawm ni ta se inkhel result a danglam phah dawrh a rinawm. An goal thun hnawl a nih hnu hian goal an thun zui teuh leh viau a, goal bar an pet per leh dawp.
Derthawng taka him hram hram Aston Villa in an khingpuite an nawr let a, vannei zawkah tangin, goal thun hmasa zawkah an tang. Villa hian an khingpuite an nawr tlang hnuin a sir lam atanga Youri Tielemans ball vawrh luh tha tak chu Ezri Konsa chuan minute 44-naah awlsam takin a tauh goal a, hmahruaina goal a thun. Derthawng zawk ni reng Villa hian 1-0 a hmahruai chungin chawlhlawk an hmang.
Chawlhlawk hnu lamah Bologna in an si phurh sut ngei tumin tan an khawh a, minute 47-na lekah goal an thun teuh hle. An pet san hret vangin an hun tha neih an hlah zui leh a, an si phurh an sut thei lo. Goal an chhuah teuh viau hnuin Aston Villa tan vanneihna dang a thleng zui leh a, mualneitu defender tihsual vangin an khingpuite an nawr tlang a. Ollie Watkins chuan near post, lei hrulah pet goal in minute 51-naah an goal hnihna a thun a, an hmahruaina a tizau.
Si hnih an phurh hnuin Bologna in goal thun tumin tan an khawh nasa leh zual. An hun tha neih hlah fovin, goal thun thei lo reng mah se hun tawp dawn hnaiah an che fuh ve ta nge nge. Minute 90-naah Jon Rowe chuan goal thunin an si phurh a sut ta nge nge. An si phurh an sut then vangin an phur viau a, tlawm pumpelh theih beiseina lian tak an nei hman nghe nghe. Goal an thun vangin phur viau mah se an phur rei lo viau thung a, minute 90+4-ah Ollie Watkins chuan Aston Villa goal thumna a thun a, an hmahruaina a tihzau belh. Watkins goal thun hnu hian goal dang a luh belh thei tawh lova, Aston Villa in Mikhual an nihna hmunah hnehna hlu tak an chang.
Bologna mualah 3-1 in an chak a, an muala inkhel zui leh tur an nih bawk vangin Aston Villa in semi-final an hnaih viau tawh a. An ke khing khatin semi-final an dai kai hial tawha ngaih a ni.
Forrest an vannei
Aston Villa rual hian English club Nottingham Forrest chu FC Porto hmachhawn turin an zinchhuak ve bawk. Portuguese club lian lakah goal chhuah hma viau mah se Forrest hi an vannei a, own goal hmangin an si phurh an sut thuai a, Estádio do Dragão-ah tlawm an pumpelh.
FC Porto hian an mikhual lakah bul an tan tha viau a, inkhel tan atanga minute 11-na lekah William Gomes chuan hmahruaina goal a thun nghal. Hma takah goal an thun vanin phur viau mah se Porto hi an phur rei lo viau thung a, hmahruaina goal an thun atanga minute hnih hnu lekah Martim Fernandes chuan an lamah a ti-goal a, Forrest si phurh a sut sak. Minute 13 chhung leka goal hnih lut bak hi hun tawp thlengina luh belh thei tawh lova, Mimualah vanneihthlak taka tlawm pumpelh Forrest in semi-final luh theihna hun tha an neih theih phah.
Ningani zana inkhel dangh SC Freiburg chuan an mikhual Celta Vigo chu 3-0 ngawtin an hneh a, Mimuala inlan zui leh tur ni mah se semi-final an hnaih ve kuarh bawk.