Hmuihmul sei ber nih tumin a inzuah

Hmuihmul sei ber nih tumin a inzuah
Bikaner, Rajasthan a cheng, Girdhar Vyas chuan kum tam tak a hmuihmul a lo zuah tawh a, tunah chuan khawvel hmuihmul sei ber record siam thei ngei tawh tura inngaiin, Guinness World Record lam a bekbawr tan ta. A hmuihmul hi a hmawr atanga lehlam hmawr thlenga tehin feet 40 vel zeta sei angin an teh a, mahse, Guinness lamin official-in an la teh that sak ve leh phawt dawn a ni.
A tirah chuan record siam tumna nei chuang lovin a hmuihmul hi a zuah satliah ve mai mai a, mahse, tunah chuan Rajastan culture leh tradition symbol pakhat a ni dêr tawh a, India ramchhung mite leh rampawn lam mi khualzin Bikaner a kalte chuan Girdhar-hmuimulseia hi hmuh a thlalakpui ngei ngei an tum deuh zel tawh a ni.
Tunah hian Guinness World Records-in khawvela hmuihmul sei bera a puan lai chu Paul Slosar (USA) a ni a, November ni 12, 2022 khan US National Beard & Moustache Championships, Casper, Wyoming-a neihah telin, a hmuihmul an teh hian 63.5 cm (2ft 1 in) a ni.
Girdhar-a hmuihmul hi sei viauin, a hmawr atanga hmawr lehlam thlenga tehin feet 40 lai thling mah se record siamnaah chuan an teh dan hi a dang ve leh thung a. Guinness World Records chuan hmui chunglama hmul to chauh an pawm a, hmui chunglam tawpna atanga 1.5cm thleng an pawm thei a, chumi china hmul to chu a sei zawng an teh thin. An teh dawna hmuihmul chu khuih theih a ni ngei tur a ni a, phiar emaw tawn emaw awih a ni lo.