Sawhthing quintal 34,600 lei tawh

Mizoram sorkarin sawhthing a lei mek a, kar kal ta (April ni 9) thleng khan sawhthing hi quintal 34,662.01 lei a ni tawh. Mizoram Agriculture Marketing Board (MAMB)-in an chhinchhiah danin, sawhthing hi ip (bag) 98,675 an lei tawh a, chu chu kg 34,66,201 niin, a quintal zawngin quintal 34,662.01 a ni.
MAMB-in sawhthing an lei dan hi, Secodary Collection Centre (SCC)-ah sawhthing hi an dahkhawm a, chung chu a thartuten an thar chhuah, hralh tura an theh khawm a ni. SCC-ah chuan sawhthing lei duhte’n an lei leh a, chutiang chuan quintal 34,662.01 tihral a ni tawh.
MAMB hotute sawi danin, a lei duhtute hian an ngamna zatin an lei a, kg 1 man Rs 50 a tlin lohna kha sorkarin a tum ve thung dawn a ni.
A lei to pawlin kg 1 hi Rs 32 te, Rs 31 te, Rs 30 tein an lei a, a lei tlawm berin RS 23-in an lei. Kg-a Rs 25-a lei an awm teuh a, Rs 25.5-a lei te, Rs 27-a lei te an awm bawk.
Sawhthing hi Rs 9,82,19,187.40 man hralh a ni tawh a, a leitu hi mi hrang hrang niin, tualchhung mi leh hnam dang an ni.
Mizoram sorkarin February ni 2-a lei tan a tum na a, a leitute nena a man tur chungchangah inbiak fel hun nghah a ngaih avangin February ni 9-ah lei tan a ni tih an sawi a, May thla tawp thlenga lei tum a nih thu an sawi bawk.
MAMB hotute chuan Mamit, Serchhip leh Aizawl District-a mite chuan kg 1 man Rs 50 a tlin lohna hi an dil tawh a, district dang pawhin an dil theih thuai a rinawm tih an sawi.