Health care scheme health scam-ah chhuah – Joseph Lalhimpuia
Health care scheme health scam-ah chhuah
– Joseph Lalhimpuia
ZPM sawrkarin health care scheme chu ‘health scam’ ah an chhuah mek niin Congress hruaitu Joseph Lalhimpuia chuan a sawi.
MPCC Political Affairs Committee member Joseph Lalhimpuia chuan, ZPM sawrkarin ‘deem empanelled’ hospital siamin cashless loa medical reimbursement bill theihna, Mizoram pawn hospital-te MUHCS atan a pawm a. Hetianga state pawn hospital te, treatment inang rengah Mizorama private hospital-te aia rate to zawk bawk si ah, MR bill theiha a siam laiin, mipui ban phak maia awm Mizorama private damdaw inah MR bill theih loh tlat chu Mizoram mipui zahlohna leh hnamdang duhsakna dik takah an ngai tih a sawi.
Health care scheme chungchangah sawrkar hmalakna hrang hrang chu sawrkar siamtu mipuiin hriat an phu em em laiin, hospital hrang hrang agreement an siampui atanga sum chetvel dan thup tlat a ni tih a sawi a. He thilah hian puanhnuai thil, mipui hriattir an phal loh thil tam tak a inphumru nia a lan thu sawiin, MUHCS leh hospital hrang hrang thawhhona chungchang chu bihchian tul an tih thu a sawi a ni.
“RTI hmangin mi hrang hrangin MUHCS hnuaia hospital-te nen an thawhhona chungchang hi zawh a ni tawh a, hospital an thawhpuite nena an inremna rate an thup tlat a. Indian Contract Act 1872 chuan thawhhona thuthlung siamtute remtih dunna in thuruk neih a phal a, he dan tlawhchhan hian mipui sum chetvel dan mipuiin an hriat theih lohna turin an up bet ta a ni,” a ti.
Section 8(1)(d) of the RTI Act chuan hetiang thilah hian ‘commercial confidence, trade secret, intellectual property’ khawih thilte pek chhuah loh a phalsak tih MPCC hruaitu hian sawiin, hemi rual vek hian public interest a nih chuan information hi pek chhuah a ngai thung tih a sawi.
“State sawrkar leh a thawhpuite inkara thuthlunna hi pawimawh hle mah se, a aia lal a awm a, chu chu Constitution of India a ni. Supreme Court pawhin vawiduai lo Right to Information hi fundamental right zing ami, Right to Freedom of Speech hnuai ami a ni tih a sawi thin a. Mipui sum chetvel dan hriat hi mipui chanvo a ni. Heng zawng zawng hi ZPM sawrkar hian palzutin hospital-te nena an inremna rate an thup tlat a. Mipui hian an sum thawhkhawm hmanga sawrkar chet dan hi hriat an phu a ni,” Joseph Lalhimpuia hian a ti.
Mizoram Legislative Assembly-ah meuh pawh mipui aiawh MLA-te zawhna, hospital tin rate hi ‘agreement confidentiality clause’ avangin pek chhuah theih a ni lo tia an chhan thu a sawi a. Kan aiawha Mizoram rorelna sang bera thute zawhna chhan duh loh chu Mizoram State Assembly hmuhsitna leh India Constitution zah lohna a ni, tiin, Assembly aiin sawrkar hnuaia awm healthcare lam thuneihna hi a sang zawk nge, tih a zawt.
“Hospital (private company) nena thawhhona hi mipui sum, thawhkhawm lehnghal hmanga kalpui a ni a. Hetiang thilah hian Law & Judicial lamin an agreement zirchian sakin vetting an ti ngei tur a ni. Hospital hrang hrang leh Health department inremnaah hian Law & Judicial vetting a awm a nih chuan tlangzarh se, a awm lo a nih phei chuan dan kalh a ni a. Sum chevel mahni kutzala tlak tir tumna a ni,” MPCC PAC member hian a ti.