Easter inkahhai bawhchhiaah Ukraine leh Russia inpuh tawn

Ukraine leh Russia hian Orthdox Easter puala hun rei lote chhungin inkahhai an kalpui chu vawi za tam bawhchhiaah an inpuh tawn.
Ukrainian sipaite chuan Pathianni tuk khan Russian sipaite hian Inrinni tlai dar 04:00 (India-a tlai dar 06:30) atanga inkahhai tan a nih atangin dan bawhchhiatna 2,299 an ti tawh tih an sawi a, sipai ralthuam keng lo pali an kah hlum pawh a tel tih an sawi.
Russian defence ministry chuan Ukrainian sipaiten dan bawhchhiatna 1,971 an ti tawh tih a sawi ve bawk a, heng zingah hian Dnipropetrovsk region-a beihpui thlak vawi thum a tel.
Ukrainian President Volodymyr Zelensky-a chuan a hmain inkahhai laia Russia-in a beihna chu a ‘awmze nei takin’ an chhang let dawn tih a lo sawi tawh a, Easter chu ‘remna hun’ a nih thu a sawi bawk.
Middle East-a indona a chhuah avangin remna zawng zawnga inbiakna neih awlsam zawk nan Easter hnuah pawh inkahhai a nih theih a beisei thu a sawi bawk a; mahse, Russia chuan a ngaihdan hi hnawlin Thawhtanni atangin an beih chhunzawm leh dawn tih Pathianni khan a sawi.
Russian sipaite hian vawi 28 beihpui an thlak a, drone hmanga beihna vawi 2,000 vel an ti niin Ukrainian sipaite chuan an sawi a, bomb leh missile an hmang lo.
Hmarchhaka Kharkiv region-ah Russian sipaiten inkahhai puan a nih hnuah Ukrainian sipai pali an that niin tual chhung prosecutor office chuan a sawi a, he thil thleng hi dan bawhchhiatna lian tak a nih thu a sawi.
Ukrainian sipaite chuan sipaite hi ralthuam keng lo an nih thu an sawi a, hei hi ‘Russia-in indonaa dah a bawhchhiatna dang’ a nih thu an sawi.
Ukraine hmarchhaka Sumy region, Russia ramri-ah tual chhung thuneituten Russian drone-in ambulance a kap a, damdawi lam mi pathumin hliam an tuar niin an sawi.
Russia defence ministry chuan Ukraine hian zankhuain Pokrovsk leh Dnipropetrovsk region-a Otradne hmun hrang hrangah vawi thum beihpui an thlak tih a sawi.
Ukrainian sipaiten Sumy leh Donetsk-a hma lam pan an tumna vawi li chu an dang niin a sawi bawk.
Russian President Vladimir Putin-a chuan kar tir lam khan Easter-a inkahhai hi a puang a, a hmain Ukraine atanga indona tihtawp tura ngenna vawi tam tak a lo hnawl tawh bawk a. Zelensky-a pawhin Easter laiin a sipaiten ralthuam an lek dawn lo tih a sawi ve bawk.
Ukraine leh Russia thuneitute hian Inrinni khan indonaa an inmansak mi 175 ve ve an inthleng tih an sawi a, civil mi pasarih ve ve an inthleng bawk.