Langtlang taka MUHCS kalpui turin MIC-in Health Care Society hriattir

Mizoram Information Commission chuan langtlang taka Mizoram Universal Health Care Scheme (MUHCS) kalpui turin State Health Care Society a hriattir.
Advocate J Malsawmzuala Vanchhawng chuan RTI dan hmangin MUHCS chungchanga a hriat duh chu Mizoram State Health Care Society hnenah a zawt a. Danin chhan hun tur a tih hun chhunga chhanna a hmuh loh avang leh chhannna a dawnah pawh a lungawina khawpa chhan a ni lo, tiin, Mizoram Information Commission (MIC) ah a lungawiloh thu a thlen.
MIC full bench chuan hei hi a ngaihtuah a, hearing-ah hian complaint thehluttu leh Mizoram State Health Care Society SPIO leh RTI zawhna luh hunlaia SPIO an inlan a. Mizoram Health Care Society leh Synod Hospital-in MUHCS kalpuina tura inremna an ziah copy leh detail pricing chu April 17 ralhmaa complainant hnena a thlawna pe turin Commission hian SPIO hi a hriattir a ni.
MUHCS kalpuinaah mipui sum (public money) hman a ni chungin, sawrkar chuan thup tam tak a nei niin complaint thehluttu hian a sawi a. Mizoram State Health Care Society-in damdawi in hrang hrangte inremna a ziahpuiah thuruk anga vawn tur tih tarlanna, ‘confidentiality clause’ dahlut telin, hemi behchhana hmang hian damdawi in hrang hrang nen inremna an siam chu mipui hriat theih loh turin an thup tlat tih a sawi.
Mizorama private hospital-te pawhin Mizoram chhung leh pawn lam private hospital dang leh sawrkar inremna siam dan an hriat theih loh avangin vawiin thlengin MUHCS an zawm theih loh phah tih sawiin, a tuartu chu MUHCS zawmtu sawrkar hnathawk, pensioner leh mipui nawlpui, damlote an nih leh si avangin, appeal hi a thehlut tih a sawi bawk.
Inremnaa confidentiality clause dahluh tel chu dan kalh a ni tih J Malsawmzuala Vanchhawng hian a sawi a. Hemi tlawhchhana thuneituten RTI zawhna an chhang duh lo leh, Mizoram Assembly Session-a MLA-te zawhna pawh sawrkarin a chhang duh lo chu Right to Information Act 2005 bawhchhiatna a nih avangin State Information Commission-ah hian a zualko ta tih a sawi a, thutlukna siam tak chu dan rorelna vawnhimna, mipui tana hlawhtlinna nasa takah a ngai tih a sawi a ni.
Mizoram Information Commission-in thupek a tih chhuahah hian, court ruling lo awm tawh chi hrang hrang tarlangin, SPIO chu tunhnuah a hun taka information pe chhuak turin a hriattir a. MUHCS chu mipui hamthatna tura duan a nih avang leh mipui sum hmanna a nih avangin, Synod Hospital nena inremna ziah bakah MUHCS kalphung leh a nihphung chu thup tum loa, mipuiin awlsam taka an hmuh theih turin website-ah pawh dah zawk tura beisei a ni tih a tarlang.