India-a sports tih hmasawn dan tur sawi

India-a sports tih hmasawn dan tur sawi
India rama Sports minister inkhawmpui ‘Chintan Shivir of Ministers of Youth Affairs and Sports of States/UTs’ chu April 25 & 26 khan Srinagar-ah neih a ni a. Mizoram Sports & Youth Services minister Lalnghinglova Hmar pawh telin session pakhat a kaihruai.
Sawrkar laipui Ministry of Youth Affairs and Sports buatsaih Sports Minister Conference hi Union Youth Affairs & Sports minister Dr Mansukh Mandaviya leh minister of state Raksha Nikhil Khadse ten a bul atanga a tawp thlengin an uap a. Session pasarih awmin, Mizoram Sports minister hian “Khelo Bharat Niti: Strengthening Centre State Coordination” tih session a kaihruai.
India-in Olympic Games 2036 thlen tumin hma a la mek a, Olympic lam hawiin India sports kalphung a inher mek. Union minister chuan he conference pawh hi Olympic Games 2036 a medal tam zawk la thei tura inbuatsaihna lam hawia kalpui a ni tih a sawi.
Ni hnih awh Sports Minister Conference-ah hian sports kaihhnawih thupui hrang hrangah India dinhmun leh hmasawn ngaihna lai thlirho niin, Olympic 2036 tinzawnin sawihona tam zawk kalpui a ni. Zirna in leh sports kaihkawp, training hmunhma leh hmanrua changtlung zawk neih, sports technology leh sports science tihhmasawn chu ngaihpawimawh zingah a tel.
Talent development mumal leh inphaman zawk neih, sports inrelbawlna felfai zawk, sports bungrua tha zawk siamchhuah leh thalai kaihhnawih thil dangte sawiho a ni bawk.
Session a kaihhruainaah Indian sports kalphung inthlak mek chu lawmawm a tih thu Mizoram minister hian sawiin, Olympic 2036 thlir chunga hmalakna chuan sports discipline zawng zawng a huam thei dawn loa, Olympic medal beiseiawmna discipline thlurbinga duat bik an ngai tih a sawi. “Kan kal dan ngairenga kan kal chuan kan result pawh a ngai reng dawn a, hma sawn tur chuan thlak ngai a awm thin,” tiin India-in sports a kalpui dan a thlak a tul tih a sawi. Sports Authority of India siamthat tul, tiin, Delhi atanga thutlukna siam mai loin state hrang hranga sports official leh association zinchilh thin turin sawrkar laipuia sports hotute a sawm.
Mizoramah Olympic Games 2036 hmathlir nei chunga hma lak mek a nih dan a sawi a. Sawrkar laipui piahlamah state leh state inkarah pawh thawhhona tha neih a pawimawh a, state hmalakna leh chin dan tha inhriattawn zung zung theih dan ngaihtuah a ngai tih a sawi.
“Sports infrastructure kan la nei tha tawk loa, kan infiammite hmasawnna atan state lian leh hausa zawkte infrastructure kan hman tangkai theih dan duan a ngai. Hetianga kan tanrual chuan India-in hma a sawn phah ang,” Lalnghinglova Hmar hian a ti.
Union Sports minister pawhin India rama sports tihhmasawn kawngah state-ten mawhphurhna sang tak an nei tih a sawi a. Kum 10 chhunga sports powerhouse ni turin ruahmanna an siam a, he ruahmanna hi lehkhapuanah chauh ni lo, district tina infiamna hmunah a takin a langchhuak tur a ni, tiin state Sports minister leh official kalkhawmte a taka hma la chak turin a chah.
State 15 atangin Sports minister an tel a. Ministry of Youth Affairs & Sports, Sports Authority of India leh state hrang hrang sports official bakah National Sports Federation hotute leh infiammi langsar tak tak an tel a ni.