Rawlthar tha ber Cooper Flagg

Dallas Maverick rawlthar duhawm Cooper Flagg chu NBA 2025-26 season-ah rawlthar tha berah thlan a ni. Cooper hian pindan khat a luahpui Kon Knueppel chu point 26 in a khum a, chawimawina ngaihhluthlawh a dawng.
Kum 19 mi Cooper Flagg hi Dallas Mavericks chuan kum 2025 khan a lakah riinna nghat chungin an la lut. A laka rinna nghattu Dallas hi khelmual chhunga chetthatna hmangin a chhang let a, season kal mekah a chetha hle. NBA game khatah point 50 chin thawkchhuak thei naupang ber a ni a. Rawlthar zingah NBA game thuma point 30 chin chunglam vawi thum thawkchhuak thei hmasa ber a ni bawk. NBA season kal mekah Flagg game tinah point 21.0 thawkchhuak ziah ang a ni a. Game tinah ball sawhlet vawi 6.7 dawng tling ziah ang a ni a, game tinah assist vawi 4;5 nei ziah ang a ni tel bawk. NBA chanchinah rawlthar zingah hetiang tithei mi dang pathum chauh an awm a, chungte chu Larry Bird, Michael Jordan leh Luka Doncic te an ni.
Rawlthar tha ber chawimawina (Rookie of the Year award ) dawng turin Cooper Flagg leh a Duke University-a a room-mate Kon Knueppel te an inel tawk hle a. Point 26 chauhin Flagg hi a sang zawk a, National college Player of the Year award – 2025 chawimawina dawngtu Flagg a chungnung ta hram a ni.
Thunder an tlang
Thawhleh zing khan champion lai Oklahoma City Thunder chuan play-off game lina an khel a. An khingpui Phoenix Suns chu a vawi li nan an hneh a, second round an inhlangkai.
Series-ah 3-0 a hmahruai tawh Thunder hian game linaah pawh an khel tha leh viau a, chak phu zawk an ni nawn leh. Game linaah hian point 131-122 in an khingpuite an hneh a, play-off first round-ah tlawm nei miah lovin an tlang a, second round an lut. Suns laka an chak nawn leh tum hian Shai Gilgeous-Alexander chuan point 31 a thawkchhuak a, a chetha lehpek hle. Oklahoma hian Los Angeles Lakers leh Houston Rockets te inkhela chak zawk zawk an hmachhawn zui leh ang.
Thawhleh zinga inkhel dangah Denver Nuggets in tlawm an pumpelh a, second round luh theih beiseina thar an nei.
Series ah 3-1 a hnufual tawh a, second round lut tura tlawm thiang tawh lo Denver Nuggets hian Minnesota Timberwolves lakah chak ngei tumin tan an khawh a, an che tha thawkhat hle. Inkhel pawimawh takah hian point 125-113 in hnehna an chang a, Timberwolves nen an inkar an tizim hret. Timberwolves laka an chak tum hian Nikola Jokic chuan point 27 a thawkchhuak a, ball sawhlet vawi 12 a dawn bakah assist bvvawi 16 zet a nei bawk a, a chetha hle.