Khuarel chhiatna atana hman tur app siam thar

Disaster Management & Rehabilitation department leh Buannel Geo Solutions & Services tangdun buatsaihin Disaster Incident & Reporting Management System – “Khuarel app” chu DM&R minister Prof. Lalnilawma’n Nilaini khan a tlangzarh.
Minister chuan, khuarel chhiatna a thlen thula mipui mimir, DM&R leh State & District Disaster Management Authority (SDMA& DDMA) ten rang taka chanchin an inhrilhhriat zung zung theihna leh chhiatna lam thil record data felfai taka dahthat theihna tur ni nghal bawk ‘Khuarel app’ duanchhuah a ni chu lawmawm a tih thu a sawi a. Mizoram chu India hmarchhak state zinga hetiang app nei hmasa ber a ni, tiin, mipuiin he app hman awlsam leh tangkai tak hi download a, hmang tangkaitu nih tum theuh turin a chah tih a sawi.
DM&R commissioner & secretary Udit Prakash Rai pawhin, mipuiin khuarel chhiatna thleng chu DM&R department leh DDMA a an hriattir zung zung theih bakah department leh DDMA lam atang pawhin khuarel chhiatna chungchanga mipui hriat tur pawimawh chu he app kaltlang hian an puang darh zung zung thei tawh dawn tih a sawi a. Hei hian khuarel chhiatna lama hmalakna a tih chak bakah Mizorama district hrang hrang leh department hrang hrang inkarah thawhhona a tichakin, a ti awlsam hle dawn tih a sawi a ni.