Aizawl Municipal-ah MCC hlip Thu tiam ni ah AMC term intan

Aizawl Municipal Corporation inthlan kaihhnawiha model code of conduct puan chu hlih a ni tawh a, AMC term thar chu mawhphurhna chang turten rinawmna thutiam an la ni atanga intan tur a ni.
State election commissioner Dr H Lalthlangliana kaihhruaiin Ningani khan AMC inthlanpui 2026 thlirlet a ni a. Mizoram Journalists’ Association hruaitute, Mizoram People Forum aiawh leh political party tin aiawh bakah election hotute an tel a ni.
SEC chuan inthlanpui boruak muanawm tak hnuaia neih zawh a nih avang leh tluang taka result chhiar a ni chu lawmawm a tih thu a sawi a. Chumi atana tha thawhtute chungah an lawm tih a sawi. Inthlan kaihhnawiha mawhphurhna nei sawrkar hnathawk zawng zawngin tha taka an chanpual an hlen avangin lawmthu a sawi bawk.
Inthlan boruak laiin, official duty-a ruat zingah an duty laia tawhsual tawk an awm loa, rilru leh taksa emaw chhungkaw lam emaw harsatna avanga thlak ngai an awm loa, Pathian kaihhruaina a ni tih Dr H Lalthlangliana hian a sawi.
Model code of conduct chu he thlirletna neih zawh rual hian hlih nghal a ni tih a sawi a. AMC term chu district magistrate hmaa oath-taking an lak ni atanga chhiar tur a ni tih a sawi bawk.
Tum danga la tih ngai loh tun inthlanpuia tih zingah, hlawhtling takin home voting an kalpui thei a; SEC office-a persons with election duty (PED) ten vote an thlak ta leh EVM-a vote chhiar theih loh harsatna thleng tha taka chinfel a ni chu lawmawm a tih thu a sawi.
Comissioner sawi danin, inthlan vuakvetah khan MCC bawhchhiatna vawi hnih awmin chinfel a ni a; MCC bawhchhiaa puh report 6 lut chu evidence nen uluk taka zirchian a nih hnuah thutling loa ngaih vek a ni.
AMC inthlanpui 2026 behbawm:
Voter awm zat 239985, vote tla zat 150638, vote tla percentage 62.77%
8 Ward No.XIX /6 Hlimen–1 Polling Station-ah vote tla tha ber a, vote nei atanga za zelah 77.72 in an thlak.
8 Ward No.II /3 Bawngkawn–VIII Polling Station-ah vote a tla chhe ber a, vote nei atangin zaah 39.30 in an thlak.
8 Vote tamna ber ward chu Ward No.XVIII niin, voters 18906 an awm a, voters tlemna ber ward no. VIII ah vote 7975 a awm.
8 Voter tamna ber polling station chu No.XVIII /8-ITI Veng-V PS a ni a, voter 1446 an awm. A tlemna ber VII/ 1-Zemabawk-IV PS ah voter 343 an awm.
8 Vote tamna ber ward chu Ward No.XVIII a ni a, voter 18906 an ni. Vote tlemna ber ward chu Ward No. VIII a ni a, vote 7975 a awm.
8 Candidate zinga vote hmu tam ber chu ZPM candidate K Lalrodinga (Ward No.XVIII) a ni a, vote 5899 a hmu.
8 A tling leh a dawttu inthlauhna ber Ward-IV ah ZPM candidate Vanlalhriatrengi’n amah hnaih bertu MNF candidate vote 2121 in a hneh.
8 Candidate-te kum chawhrual chu kum 50 a ni a, thlantlin bikte kum chawhrual chu kum 49 a ni.
8 Candidate tling zinga upa ber VL Zamlova (Ward-XV ) kum 69 a a ni a; tling zinga naupang ber Christina Roluahpuii Sailo (Ward–VIII) niin, kum 31 a ni.
8 Veng tamna ber ward chu Ward NO.XVIII a ni a, veng 8 a awm. Veng tlemna ward 6 – V, VI, VIII, XII, XIII leh XVI ah veng pathum theuh an awm.
8 Thlantlin zingah post graduate 7, graduate 10 leh under graduate 2 an awm a, under matric an awm lo.