Bayern hnehin PSG an tlang

May 6, Thawhleh zan khan UEFA Champions League semi-final thawhhnihna khelh chhunzawm a ni a, Allianz Arena-ah Bayern Munich leh Paris St-Germain te 1-1 in an inhnehtawk. Mimualah tlawm an pumpelh vangin champion lai PSG in si belhkhawmah 6-5 in hnehna an chang a, final an lut. PSG hian Champions League season kal meka tlawm la nei lo Arsenal an hmachhawn zui leh dawn.
Champions League-a champion lai Paris St-Germain leh German champion Bayern Munich te hi Parc de Princes-ah inhmachhawnin goal 9 ngawt a lut a. Semi-final thawhkhatna hi UCL semi-final awm tawh zawng zawnga hmuhnawm ber ang hiala sawi a ni. An inkhel hmasa zawk hi a hmuhnawm em vangin semi-final lehlama Arsenal leh Atletico Madrid te inkhelin sawisel a hlawh phah viau nghe nghe. Semi-final thawhkhatnaah goal 9 ngawt lutin, inkhel hmuhnawm tak chhawpchhuak bawk mah se thawhhnihnaah erawh goal hnih chauh a lut a, beisei erawh a phak bik ta chiah lo thung.
Bayern Munich hian Fifa Club World Cup semi-final leh Paris khawpuia an ngam loh PSG hi an mualah lo hnehin final luh ngei an tum hle. An mualah chak tum viau mah se goal erawh an chhuah hma viau thung. Inkhel tan tirhteah PSG hian fuh takin an khingpuite an nawr tlang nghal. Tun laia winger tha ber ang hiala ngaih Khvicha Kvaratskhelia chuan tha zetin Ballon d’Or kawl mektu Ousmane Dembele tan a chhawpsak a. Dembele hian minute 3-na lekah awlsam taka pet goal in, hmahruaina goal a thun nghal.
Hma takah goal an thun vangin PSG an phur a, mikhual an nihna hmunah inrinawkna sang zawk nen an inlan. An si phurh sut tumin Bayern Munich in tan an khawh zui chiam a, inkhel a hmuhnawm hle. Fuh taka an khingpuite nawr tlangin Michael Olise chuan goal thun theihna hun tha nei bawk mah se PSG tlarhnungin fuh zetin an lo block hman hlauh a, vanneihthlak takin an him hram. Hemi hnu hian Kvaratskhelia bawk a langsar nawn leh a, Bayern tlarhnung a chawk phar nasa leh pek hle.
An si phurh sut tum viau mah se Bayern an hlawhtling thei mai lo. An si phurh an sut theih loh reng hnuin hun pek belh minute 90+4-ah Harry Kane chuan goal thunin an si phurh a sut ta nge nge. Kane hian season kal mekah goal 55 a thun tling chiah a, a chetha zawn hle. Champions League-ah champion se Ballon d’Or a dawn mai a rinawm viau a, PSG ngam lova an tlak tak si vangin chawimawina sang a dawn loh mai a hlauhawm ta hle.
Kane goal thun hnuin Bayern in goal dang an thun belh thei tawh lova, PSG chu si belhkhawmah 6-5 in an ngam lova, Champions League final an lut zo ta lova, uiawm takin an tla.
PSG laka an tlawm danah Bayern Munich an lawm lo hle. PSG player te an inpet per a, hand-ball vanga penalty hmu ngei tura an inngaih laiin mak tak maiin penalty pek an ni lo. Atletico Madrid laka Arsenal penalty chawi dante ngaihtuahin Bayern hian penalty hlawhchhuak ngei tura ngaih an ni. Penalty an hlawhchhuah loh bakah hian PSG defender in a handball chiang tak chu lak a ni lova, ngaihdam a ni tehtlat bawk. Bayern Munich leh PSG te inkhel hamtu Portuguese referee João Pinheiro chuan duhkhawp a hlawh lo hle a, sawisel a hlawh zui hle. Bayern hi an chakna tur ruksak ang hiala sawi an ni.