An MP-ten British PM bâng turin an nawr

An MP-ten British PM bâng turin an nawr
Sir Keir Starmer-a chu British prime minister a nih chhunzawm zel theih nan a bei mek a, Labour eng emaw zatin Downing Street chu chhuahsan turin an nawr mek.
Home Office Minister Jess Phillips telin a sorkara member pali chu an bâng tawh a, kar hmasa khan an inthlana an party an chet chhiat avangin Labour MP tam takin bâng turin an ngen bawk.
Home Secretary Shabana Mahmood telin cabinet minister eng emaw zat pawhin prime minister chu a nihna a kalsan hun tur ruahman turin an ngen a; mahse, a hma lawka kar tina an tih cabinet thutkhawmah Sir Keir-a hian bân a tum loh thu a sawi thung a, Labour hruaitu ni tura amah chotu an la awm rih lo bawk.
MP tumahin Sir Keir-a dodal turin tih dan pangngaia tia chona nei an la nei lo va, amah paih thlaa party hruaitu a nihna khing turin party dan angin a khingtu chuan thlawptu 81, Labour MP 20% thlawptu neih a ngai a ni.
Meeting zawhah hian Housing Secretary Steve Reed leh Work & Pensions Secretary Pat McFadden te bakah an tanrualpui pawimawh tak takte chuan Sir Keir-a hi an thlawp chhunzawm zel thu chanchinbu mite an hrilh bawk a. Hetih lai hian party hruaitu ni tura amah elna thei tura ngaih, Health Secretary Wes Streeting chuan Downing Street a chhuahsan laiin thuthar thehdarhtute hnenah engmah a sawi ve lo.
Sir Keir-a thawhpui dang, Foreign Office Minister Jenny Chapman-i chuan prime minister kaihhruaina chungchang hi ‘sawiho mek’ a ni tih a pawm a; mahse, cabinet thutkhawmah minister tumahin an dodal lo tih a sawi.
Labour MP 80 chuangin vantlang hmaah Sir Keir hi bâng turin an ngen a, a nih loh pawhin a bân hun tur siam turin an ngen a. Minister pali – Jess Phillips, Zubir Ahmed, Alex Davies-Jones leh Miatta Fahnbulleh te chuan an nihna atangin an bâng tawh.
Minister puitu paruk pawh Thawhlehni khan an bâng a, a thlaktute pawh ruat an ni tawh a. Bâng dang pawh an la awm rin a ni.
Streeting-i bakah hian deputy prime minister hlui, Angela Rayner-i chu Labour MP zingah Sir Keir-a dodaltu ber nia ngaih a ni.
Prime minister hian a dinhmun tihngheh tumin Thawhtanni khan hmanhmawh takin thu a sawi a; mahse, hei hian a tichhe zawk niin a lang a, a hnu darkar eng emaw zat chhungin Labour MP zingah bâng tura duhtu an pung.
MP-te zinga lungawi lohnna hi kar hmasaa inthlana Labour an chet chhiat hnuah a ni a, England puma tual chhung inthlanah councillor 1,500 vel an hloh.
Wales-ah pawh an thuneihna chhuhsak an ni a, Scottish Parliament inthlanah pawh an chet chhiat ber tum a thleng.