e-ram hmanga ram teh diltu mi sing chuang an awm tawh

In hmun lo ram teh/ tehthat leh a kaihhnawiha Land Revenue & Settlement department hnena online hmanga thlenna, e-ram hman a nih hnu ah diltu sing chuang an awm tawh a. Duhsak bik awm loin dilna luh hmasak dan indawta tih sak an ni tih a changtu minister B Lalchhanzova chuan a sawi.Land Revenue & Settlement minister hian mipuiin awlsam zawka an chhawr theihna tura department chhung inrelbawlna an her danglam, dan thar an neih leh dan siam thar tum mek leh thil thar an chhawpchhuah a sawi a. 2024 December-a an phochhuah tak ‘e-ram’ hi a enchhinna hmasa atan Aizawl district hman niin, district danga kalpui zel tum a ni tih a sawi.
e-ramah hian dilna 10786 dawn a ni tawh a. Mitinin rualkhai taka sawrkar an chhawr theihnan e-rama process zawng zawng chu ‘a lut hmasa sa bawhzui hmasak’ tura ruahman a ni tih a sawi. “Duhsak zawng leh thil dang avanga hmanhmawh bikte lo process hmasak theih a ni lo,” a ti.
e-ram hman a nih avang hian department chhungah kalphung engemaw chen thlak ngai a awm bakah software lamah fel tawk lo lai a awm thin avangin mipuiin harsatna engemaw tawh chang a awm a; hriatfiah hmasak ngai an neih bawk thin avangin, awlsam zawka mipui harsatna engemaw chen sutkian a nih theihnan Whatsapp Bot leh IVR (Interactive Voice Response) buatsaih mek a ni tih a sawi.
Whatsapp Bot hi peihfel thawkhawt tawh niin, no : 84158 06438 ah engtik lai (24×7) pawhin harsatna thlen theih a ni a. IVR hi peihfel thuai tum niin, hemi ni lo pawhin, Whatsapp Bot leh IVR hian office hun chhungin mihring lo dawngsawngtuah a redirect thei tho dawn tih a sawi a ni.
Stamps & registration chu state ho sum hnar pawimawh a nih laiin, Mizoramah chuan duhthusamin an la hmu tha loa, hma an sawn theihnan district tina assistant commissioner (Revenue) bakah SDO (Civil) chu sub-registration officer-a ruat niin, mipuiin stamps & registration an tih theihna pawh chhawp belh zel a ni a; e-stamping tih theih tep a ni tawh tih Revenue minister hian a sawi.
“Mizoram-in hemi kawngah hian bul kan tan tlai deuh a, sum hnar pui takah kan la hmang lo deuh. Sawrkarin theihtawpa tan la chhoin, kum hnih- thum hnu ah chuan cheng vaibelchhe 50 vel lakluh theih a, kum 5/6 ah chuan vbch. 100 vel lakluh theih kan inbeisei. Chumi atana hmalakna hrang hrang kalpui mek a ni a. Hei hi state sawrkar sum dinhmunah tangkaina a neih chhoh zel theih kan beisei,” a ti.
Heng bakah hian minister chuan LR&S department insiamthat mek dan, thuneihna semzaia mipui tana awlsam zawk an chhawp chhuah mek dan leh hma an sawnna, hmasawn tuma hmachhawp an neihte a sawi bawk.
Kum 4 chhunga stamp & registration-a sum luh dan:
Kum Stamp Duty Registration Total
2022-23 1,39,69,950 6,52,29,141 7,91,99,091
2023-24 2,12,70917 6,26,58,938 8,39,29,855
2024-25 7,22,32,505 6,32,366,346 13,54,68,851
2025-26 12,34,10,859 7,86,48,303 20,20,59,162