Minister-ten sawrkar school an tlawh

School Education minister Dr Vanlalthlana leh Aizawl East II bialtu MLA, minister B Lalchhanzova te chuan Ningani khan Aizawl East II constituency chhunga school thenkhat an tlawh a. School mamawh hrang hrang a hmunah enin hmalak dan tur an sawiho. Minister pahnih hi AMC executive corporator Christina Roluahpuii Sailo chuan a tawiawm.
Chite Upper Primary School leh Govt Primary School Chite an tlawhnaah School Management Committee leh khawtlang hruaituten an mamawh an lo thlen a. School ram a hmunah enin, school-in anmahni pual building an neih theihnana hma lak dan tur sawiho a ni. Tunah Chite UPS leh Govt PS Chite hian Mizoram State Sports Council hnuaia Chite Mini Sports Complex building chu classroom atan an hmang mek.
Education minister chuan, kan ram zirna in hma a sawn zel theihnan public- private partnership (PPP) mode-a sawrkar leh kohhran thawh dunna hmanga school thenkhat enkawl tumin ruahmanna kalpui mek a ni tih a sawi.
Bialtu MLA pawhin a bial chhunga school awm chu an hamthatna tura hma lak a nih dan a sawi a. Kawng hrang hranga hmachhawp fel tak neiin hmasawnna tur ruahmanna siam zel a ni tih a sawi a ni.
Chite UPS leh Govt PS Chite bakah Govt. Primary School-II Armed Veng South, Govt Primary School-I Armed Veng leh Govt. Armed Veng Middle School an tlawh bawk.
Minister-te hi School Education director Angela Zothanpuii leh department hotu dangten an tawiawm a ni.