User fee luh that loh vangin bawlh hlawh sawngbawlna kalpui tha lo

Bawlhhlawh sawngbawlna hmun chu a hmangtu mipui atanga hman man – user fee an pek tlingkhawm atanga enkawl zui thin a ni a, he fee hi a luh that thin loh avangin a enkawl kawngah harsatna a awm thin tih sawi a ni.
State Water & Sanitation Mission (SWSM) atanga an dawn, Aizawl district tana tawihtheilo khawnkhawmna tur lirthei (dry- waste collection vehicle) pali chu Thawhtanni zing khan Aizawl District Water & Sanitation Mission (DWSM) chuan a hmangtu turte hnenah a hlan a. DWSM chairman, bawrhsp Er Lalhriatpuia sawi danin, lirthei pali (Dry Waste Collection Vehicles) hi Swachh Bharat Mission Grameen (SBMG) atanga lei a ni. Lirthei hi pasarih lei ni mah se, Aizawl district hian pali a chang a, Seling Plastic Waste Management Unit enkawltu Vanzel EcoSolution hnenah pahnih hlanin, Aibawk Plastic Waste Management Unit enkawltu Waste Tech & Bio-Energy hnenah pahnih bawk hlan a ni.
Tun dinhmunah PHE Department enkawl SBM-G hnuaiah hian Mizorama puma hmun 5-ah tawihtheilo bawlhhlawh sawngbawlna mumal taka kalpui mek a ni a. Aizawl district bikah hmun hnihah awmin, Thingsulthliah RD Block leh Darlawn RD Block huamtu Seling PWMU leh Aibawk RD Block leh Tlangnuam RD Block huamtu, Aibawk PWMU an ni.
Heng bawlhlawh sawngbawlna hmun hian an vaiin khua 48 atangin in 12000 vel (12000 households) a huam (cover) a, khaw tam zawk huam tura hmalak mek a ni bawk. Heng bawlhlawh sawngbawlna hmun hi mipuiin a hman man (user fee) an pek tlingkhawm hmanga enkawl a ni a. User fee hi duh anga a luh that thin loh vangin bawlhhlawh sawngbawlna hmun hian harsatna lian tak an tawk thin a, bawlhhlawh phur lirthei semchhuah a ni hian he harsatna an tawh thenkhat a chhawk zangkhai ngei rin a ni.
Lirthei bakah hian heng bawlhhlawh sawngbawlna hmunin a huam khua zinga bawlhhlawh thliarhrang tha leh user fee pe tha thlanchhuah khua 23-a dah turin vantlang bawlhhlawh bawm 421 semchhuah tel nghal a ni.