Indonesia lirnghingah mi 51 vel thi

Lirnghing na takin Indonesia khawchhak lam a sawia thi chu mi 51 vel an ni tawh a, mi 5,000 chuang hmun himah insaseng an awm bawk a. Rescue team-te chuan lei minin a hnawh kawng then hna leh in chim kara dama la tangte lak chhuah tumin an bei mek zel.
Magnitude 7.7-a na hian Inrinni zing dar 5:58 (India-a zing dar 4:28) khan Flores Island, East Nusa Tenggara province-a Ende hmarthlang kil, km 68 chuanga hla atangin a sawi niin US Geological Survey chuan a sawi a, lei hnuai km 10-a thuk atanga intan a ni.
Kum tam tak chhunga Indonesia-a lirnghing thi tamna ber pakhat tling a thawh hnuah hian vawi 341 vel nghing nawn (aftershock) a awm leh tawh.
Hliam na deuh tuar mi 36 leh tenau deuhva hliam mi 77 an awm niin Deputy Health Minister Benjamin Paulus Octavianus-a chuan Pathianni khan TV-ah a sawi.
Disaster mitigation agency, BNPB chuan a tuar na ber pakhat, Sikka regency-ah chuan mi 3,300 chuang an in chhuahsan leh tangkhang an awm a, sports arena-ah an awm khawm niin a tar lang.
Lawng chawlhna khua, Maumere-ah chuan mi cheng thenkhat chu an in chim kawtah tarpaulin kaihin an khawsa a, thenkhat chu damdawi in tuala puan in kaihah enkawl an ni bawk.
“Sikka-a cheng zawng zawng deuhthawin in chhunga awm an ngam lo va, an kawtkai leh tualah puan in kaihin an khawsa hlawm,” tiin an rehion deputy chief, Simon Sabandi chuan news channel KompasTV a hrilh.
BNPB head Lieutenant General Suharyanto-a chuan a intanna bul, Nagekeo regency-ah chuan in 157 vel chhe vek leh 200 dawn chhe nual a awm a, khaw mu 2,000 chuang an insaseng niin a sawi.
Heng laia mite pui tur hian helicopter pathum leh lawng tirh niin thlirkar te tak te, tlawhpawh khirh lai a nih thu a sawi.
East Nusa Tenggara police chief Rudi Darmoko-a chuan chhiatna a thleng nasain an province-ah in chim leh tlu a tam hle tih a sawi.
Maumere-a chhanchhuah leh mi zawn hna thawhnaa hotu, Fathur Rahman-a chuan rescue team-in lei minin kawng a dan avangin Nagekeo an la thleng vek thei lo va, lawngin an thawk chhuak tih as awi.
Cabinet Secretary Teddy Indra Wijaya chuan sipai leh police 3,500 chuang tirh chhuah an ni tawh tih a sawi a. In 1,300 chuang a chhia a, power awm loh vangin petrol station 20 khar a ni tih state energy firm Pertamina chuan a sawi ve bawk.
East Nusa Tenggara-ah hian thuneitute chuan emergency puan turin hma an la mek a, an puan chuan sum leh tul dang tam zawk pek theih an ni ang.
Lirnghin hnua tsunami warning an tihchhuah erawh hlih leh tawh a ni.
Tun tuma lir a nghinna hmun vaukam hi December, 1992 khan lirnghing na takin lo sawi tawhin tsunami thawk zui nen Flores-ah mi 2,500 chuang an lo thi tawh.
Indonesia hi mihring maktaduai 290 vel chenna, thliarkar 17,000 vel awm khawm a ni a, lirnghin duhna hmun tak a nih avangin Pacific ‘Ring of Fire’ tia sawi thin a ni.