A birthday party lawm haw lam accident vangin boral

Delhi University zirlai pakhat chu a birthday party lawm zo haw lam car chesual vangin a boral a, police te sawi danin mobile phone a hla an play siamrem an tum laia thleng a ni.
An chuanna car-ah hian mi panga chuangin, zu an rui hlawm hle nia sawi a ni a. A tlanchak mai bakah, an ruih em avangin car an thunun hman tawh lo nia sawi a ni. A birthday neitupa ber hi boralin, a thiante dangte pawhin hliam an tuar vek hlawm.
Police ten thil thlen dan an enzui zelnaah chuan, an ruih hlawm em em a, an tlanchak hle bawk. An mobile phone a hla play chu play-list thlak tuma an en laiin chetsualna hi a thleng ta thut niin an sawi. Car a chuangte hi an vaiin Delhi University (DU) zirlai vek niin, kum 18 leh 19 inkar vek an ni hlawm.
Delhi Deputy commissioner of police (north) Manoj Kumar Meena chuan, an vai hian finfiah vek tawh an nih thu sawiin, party lawm zo haw lam an nih thu a puang chiang tawh bawk a. He thil thlen hun hi ningani zing nichhuah hun lai vel a nih thu a sawi bawk.