A chhe zawnga insawi vak vak hi kan hnam hmel tibaltu a ni – Zoramthanga

Mimal a chhe zawnga insawi sak vak vak chu thil hrisel lo leh a hnam ang pawha kan hmel tibaltu a nih theih avangin MNF party mite chuan ching ve turin an president Zoramthanga chuan a chah.
Nilaini khan MNF elected OB, National Core Committee, PAC, advisers, general secretaries leh secretaries ho thukhawmin MP inthlan campaign kal mek an thlir ho a. An candidate-ah beiseina an nei sang a, candidate chhuanawm tak leh huaisen, ram leh hnam tana tlanchhe ngai lo thehchhuah a ni chu beiseina sang tak neih tirtu a ni tih sawi a ni.
Politics-ah a lawmawm zawnga thil thlir thiam a tul a, chu chu mipui pawhin an lawm zawk fo, tiin Zoramthanga hian a sawi a. Pu K Vanlalvena an nei chu an vanneih pui ngei a beisei tih a sawi. “Mipui rilrem tak MP ni mek, huaisen leh ram leh hnam tana inpe tak a nihna min hriatpui avangin mite ngaihzawn a hlawh em em a ni,” a ti.
ZPM candidate chu belebut taka an hotu thenkhat hriatkim lem loh leh an hruaitute zinga itawm tak tak an neih thlimna kara an vawrhchhuah a ni tia sawiin, hei hian mipui mar deh kawngah ngaihtuahna thui tak seng leh seng lo hmel a lo tilang ta tih a sawi.
Mimal a chhe zawnga insawisak vak vak chu thil hrisel lo leh a hnam ang pawha kan hmel tibaltu a nih theih avangin an ni chuan ching ve lo a, hetiang uar thin pawlte ze chhe tak chu ching ve lo turin MNF president hian an party mite a chah. “Pu K Vanlalvena dinhmunin san lam a pan zel avangin beihna chi tinrengin an bei chho zel a. A inhnamhnawih reng reng lohna Kolkata-a Mizoram House hmun nuam zawk leh zau zawk, lian zawk leh dawnghlawk, remchang zawka sak tum avanga a hlui tihral chungchangte nasa takin an vawrh mek a. Hralh tum hun laia engmah sawi duh loin mipui rilru vawiinah hruaikawi an tum mek a ni,” a ti.