A chinfel nan debate ni lovin a chhuia chhui…

ZPM Legal department chuan thubuai pathum, Ropeway & Skywalk (Irregularities in the construction of Ropeway & Skywalk), NABARD sum hmanga sikul chei that (Misappropriation of NABARD Loan for renovation of schools in Mizoram) leh Lengpui Airport cheithat (Mismanagement in the renovation works of Lengpui Airport) chungchang CBI chhuitir tura ngenna nimin khan Lokayukta Chairman hnenah an thehlut a. Mizoram sawrkarin ‘consent’ a pek nghal an rin thu an sawi nghal bawk.
CBI hnena ‘general consent’ pek chungchanga thu inchuh awm mek karah, hetia CBI chhuitir tura thubuai pathum thehluh a han ni ta hian, debate buai ngai lovin thu inchuh mek hi a rawn tichiang mai dawn ta tihna a ni awm e.
Engemaw thu inchuh a awm changa ‘debate’ sawirik leh ngawt mai hi a chinfelna a ni hran lo a, debator-te thiam leh thiam loh enna mai a ni a, thubuai chinfelnan a hmantlak loh. A hmantlak lohzia pawh, political party hrang hrangten debate motion – ‘Mizoram hmasawnna tur’ chungchanga inthlanpui apianga election campaign (debate) an neih thin hian, kum hei leh chen, ram zim te, mihring tlemte awmna hmasawnna tluantling, ei leh bara intodelh takngial pawh an la thlentir theih loh dan atang hian a lang chiang em em tawh a ni. Chuvangin, debate buangbar lovin, a chhui ngai hi chu chhuitir zung zung mai ila, thubuai hi chingfel zung zung ila, eirukna dang lo piang leh thei tur pawh a tawmim deuh mahna.
Ropeway leh Skywalk hi, India sawrkarin tourism promote nana a duan Swadesh Darshan Scheme (SD1.0) hnuaia Mizoramin project pahnih a hmuha pakhat zawk – Development of Eco Adventure Circuit (2016-17) – Aizawl – Rawpuichhip – Khawhpawp -Lengpui – Chatlang – Sakawrhmuituai tlang – Muthi – Beratlawng – Tuirial Airfield – Hmuifang ami kha a ni a. Ropeway hi Chaltlang leh Durtlang inkar ami tur niin, Skywalk hi Sakawrhmuituai tlangah a ni ve thung. Ropeway leh Skywalk chungchang hian sawi a hlawh deuh bik a, hemi ruala component dangte pawh khi, tun thlenga thawh zawh fel tak tak la ni lo a ni hlawm a, Ropeway leh Skywalk chauh chhuitir lo hian, Eco Adventure Circuit hnuai ami hi a vaiin chhuitir vek law law ni se a tha awm e.