RK Dawla
Mb 9366095658
-- Advertisement --
1. March thla tâwp kan lo thleng leh ta a. Kumin chu ruahtui kan dawng hma deuh a, kan dawn zeuh zeuh chhoh pawh a beiseiawm viau. Chutih laiin Ngaw kan suat nasa a, kawngpui laih leh lo/huan siam vangin. Kan envinronment tihchhiat hi a theuneu lo viau âwm e. Kan hriat reng tur chu envinronment tha siamtu ramngaw dur kan neih that a, kan neih zauh loh chuan, kan huan leh lo lam thlaiten an tuar zel dawn a ni. Ram kâng nasa tak hriat tur a tlêm erawh kan hmasawnna lawmawm tak a ni e.
2. Leiah hian thilto leh nungcha ruang tawih atangin organic matter a insiam a, thilto nunglai zung atangin root exudates insiamin hei hian leiah organic matter a siam bawk. tawih tur tam tham thloh thei thilto kan neih that lohva, exudates siam tam theitu thilto kumhlun kan ngah hi kan ram awihtlanah hian a pawimawh tawpkhâwk a. Hei hi tuihna siamtu, lei tithatu leh thlai natna leh rannung vengtu a ni nghal a ni. Ngaihtuah chiang mang hlei lova, ramngaw thiah/vah chiam te, thlai chi khat chin tlur leh kawng laihna vûng duhdah taka paih mai maite hi kan tu leh fate lu chunga meiling chhêk khawm kan ni a, awmze neia kan bansan a tul tawh hle.
3. Lei hi a nung a, a chhungah hian nunna nei tinrêng, mitlâwnga hmuh tham loh atanga hmuh tham thlengin a in-process luih luih a, chutiang tura Pathianin a siam chu a ni, leilung hi. Lei a nun chuan, a thi thei tihna a ni bawk a. Lei thi-ah chuan lei hrik tangkai ni lovin, hrik hlauhawm pui pui an insiam pung hma êm êm thung. Tlangrama chêng kan nih vangin, lei a kalral chak a, a insiam tha leh har a. Tihchhiat a awlsam êm êm laiin siamthat leh erawh a satel speed ruih tawh thin a. Hei vang hian hmunhna nghet kan din dawn reng rengin a tlem thei ang ber ramngaw tihchhiat leh a tam thei ang bera kan hmunhma hman tangkai kan tum zawk tur a ni. Lei vawnthat leh kalral vên hi step 2/1 mai a ni lo ang bawkin, lei atanga hlawkna kan dawn theih pawh kawng 2/1 mai a ni lova. Mi tam tak chuan, thlai chi khat ching nghekin, a rem dan danin, engmah hman hreh nei lovin kan che a. Thlai chi 2/1-ah thar teuh kan tum vangin. Mahsela, hetiangah hi chuan Pathianin leilung a siam dan phung kha ngaih pawimawh a ni thei lova, lei nunna kan tichhia a. Kan tihchhiat hnawh khat turin vai leitha leh tûr (pesticide) chi hrang hrang nen chêt chiam a ngai tawh thin.
4. Organic farming/Biological farming-ah chuan thlai ni lovin lei kha kan enkawl phawt a. Lei a lo that chuan, leiin thlai chu a châwm mai thin. India rama kan organic farming kalpui dan hi a kal-khat viau mai a, chemical fertilizer leh pesticide aiawh (alternative) tur organic version kan zawng suau suau a ni ber a. Hetiang hi chu a tlo (Regenerative/sustainable) tak tak chuang lo. Organic principle dikah chuan, tlo-na hi ngaih pawimawh ber a ni thin. Mi ramah chuan, ram zau pui pui, hmakhawsâng ata tawh an enkawl, leilung da tawh kha pesticide leh chemical fertilizer nen commercial purpose atân an enkawl a. Chungho pawh chu organic version-a (thlâk) transform an intihhmuh chho mêk a. Keini ve chuan hectare 2/1 lekah pawh enkawl zau kan intia, ‘Organic chu a hautak’ tiin kan zuam lo mai thin. Hei hi a chhan dik tak chu, organic farming kan hriatchian loh vang (ignorance) leh kan remhriat loh (inadequate technical knowledge) vang zawk a ni. A tum tak tak tân kan ramah hian Organic farming hi thil har a ni lova. Kan mindset kan thlâk kha a ngai hmasa mai zawk a ni e.