A hming…

MYC chairman chuan, ‘Super IAS’ tih thin kha ‘Mission UPSC’ tia thlak a nih thu a sawi a. UPSC exam tura Delhi-a inbuatsaiha awm mek mizo thalai 10-te hnenah, mizo mipui ten beiseina sang tak nen an thlir tih a hrilh bawk.
Mizoram atanga IAS tling hnuhnung ber kha Grace Lalrindiki Pachuau niin 2013-ah a tling a. Kum 2013 hnu lamah kum 10 chhung chu Mizoram atanga UPSC Civil Services Exam paltlang zo kan awm leh ta lo va. Hei hi a veiawm takzet a, kan education system hi her danglam a ngai a ni lo maw tih ngaihdan lian tak a pian phah nghe nghe a nih kha.
Engemaw chenah, zirna lama hmalakna thar hrang hrangte pawh a chhuah phah niin a lang. Chu mai bakah, sawrkar, mimal leh pawl hrang hrang thahnemngaiten UPSC hnuaia CSE paltlang thei tura Mizo thalai lehkhathiamte chherchhuah tumin sum leh pai, tha leh zung sengin kawng hrang hrangin hma an la thin a.
Hetianga hmalakna karah hian sawrkar pawhin kum 2022 atang khan thalai lehkhathiam tumruh, CSE paltlang tura inhuam mi 40 tan sawrkar sensoa a thlawna coaching pekna tur programme a ruahman a, a hming pawh ‘Super IAS 40’ tih niin, heng mi 40 zinga tel tum hian mi 500 velin exam an bei nghe nghe a nih kha.
Super IAS hi kum hnih kalpui a nih hnuah, a hming hi ‘Mission UPSC’ tia thlak a ni leh ta a. Kum sawm zet Mizoram atanga direct recruitment-a IAS tling zo kan awm tawh loh hnuah, challenge sang tak siam thei tura rin ‘Super IAS’ tih chu thalaite cho phur tura hming vuah a ni a. A engamah hmaa ‘Super’ han tih nghal ngawt chuh… tia lo sawi hnawm tum an awm ve mek bawk a.
Hmingah te, pawn lam lan danah te hian kan buai thin a; a chhungril lam uluk si lo hian. Thawkkhat kha, MLA-te tizahawmtu nia ngaia car man to lei te pawh a awm tawh bawk kha.
A pawimawh ber chu ‘hming’ emaw, pawn lam lan dan emaw ni mai lovin, ‘a tobul’ uluk leh chhung ril takna hi a ni.