A hun taka hna zawh…

Chief minister chuan sawrkar official-te chu a hun taka hna zawh ngei tum turin a chah a. Sawrkar thar neih hmaa PMGSY hmalakna vawiin thlenga la thawh, a huna zawh hman loh tur nia lang chu chak taka thawhtir turin chief minister hian a chah a. “Sawrkar thar kan neih hnua hnathawhte phei chu a hun taka zawh ngei kan tum tur a ni,” a ti.
A hun taka hna thawh zawh loh hi kan kalphung pakhat ni deuh tawhin a lang a, chutih rualin hmasawnna hna thawh zawh loha hluihlawn tak mai mai a awm thin bawk.
Kan hriat angin Kejriwal-a kaihhruai sawrkar hnuaiah hmasawnna hnathawh a chakin, a hun taka zawh chu sawi loh, a hun bituk aia hmaa thawh zawh, hnathawhna tur cost estimate aia tlem zawk daiha hna tha taka thawh theih a nihzia an proved tawh a. Hei hian a entir chu, hmasawnna hna thawh hun chhung bituk hi mithiam ten a hna hautak dan azira an ruahman a ni thin a, dik tak leh thawh dan pangngaia thawh a nih chuan sum ruahman hmangin a hun takah thawh zawh theih a ni, an lo tih hi a dik hle a ni.
Mizoramah hian hmasawnna hna reng reng, a hun taka thawh zawh leh zawh loh hi chu a thupui vak lo va, a hun taka thawh zawh hman loh a nih hnu ahmanah, hna quality reng reng tha tak hi a awm mang ngai lo hi a veiawm hle a. Building construction chungchangah pawh, sawrkar office building ropui tak tak, a life span tur ang a thlen hma daiha thiah ngai a awm zut a. Chu aia langsar zawk chu, kan kawngpui siam dan hi a ni. A thawh hun chhung tur bituka thawh zawh chu sawi loh, tlai tawkah hna thawh zawh a ni a, thawh zawh a nih hmain thawh tawh chin a lo chhe hman a, a hna pumpui thawh zawh a han nih meuh chuan thawh hmasak lam chu repair a lo ngai leh hle tawh thin. Hei hi chu phat rual loha thudik a ni.
Chuvangin, thawh zawh hun ringawt ngaih pawimawh laiin, a hna quality lamin ngaihthah a hlawh phah ang tih a hlauhawm a, hei hi fimkhur nan kan hman tel a pawimawh khawp ang le.