A kir leh ruala goal thun Messi

A kir leh ruala goal thun Messi
Kumin July thla Copa America final-a Colombia an hneh tuma a kheimit a tihnat hnuah captain ni chunga World Cup-a Argentina champion-puitu Lionel Messi chuan khelmual a lut leh ta lo vang vang a, Inrinni zan khan hliam thawhsanin Inter Miami tan a inlan a, goal hnih thuna assist vawikhat siam bawkin a club chu Philadelphia Union lakah 3-1 hnehna a chanpui.
World’s best player chawimawina Ballon d’Or award tum riat tehreng dawng tawh Messi hi tunthla World Cup qualifiers pawh kha ram tan a khel thei lo a, Major League Soccer Eastern Conference standing-a hmahruaitu ni mek Miami tan pawh league game riat zet a khel thei lo a, mahse, a dam rualin footballer ropui bik a nihzia goal hmangin a nemnghet zui ta chat a ni.
Kum 37-a upa Barcelona star hlui hian thla thum zet a chawlh hnuah a tir atanga khelmual lutin minute 90 chhung a khel tluan nghe nghe.
An thah fel awrh tihah minute khat pawh an khelh tlin hmain Philadelphia lamin Mikael Uhre goal hmangin hma an hruai a; minute 26-ah Messi chuan lehlam defender bumin a Barca team-mate hlui Jordi Alba leh a thianpa Luis Suarez thawhrah atangin mikhual siphurh a sut.
Minute a liam leh a, Messi bawk hian Alba siamsak atangin an goal hnihna a thun zui leh a; second-half injury time tawp dawnah a goal hmasa zawk siamsaktu Suarez-a goal tur a chhawpsak ve leh bawk.
Tun season game 13 khelha goal 14 zet khung tling tawh Messi hian inkhelh banah a chauh ve det thu sawi chungin, “Hun rei tak ka chawlh hnuah khelmuala rawn kirleh hun hi ka nghakhlel takzet a; squad rualin training ka zawm chho bek bek a, ka thaa ka hriat hnuah kir turin thutlukna kan siam ta a, tun dinhmun ka thleng leh thei ta hi ka hlim takzet a ni,” a ti.
Inkhel dang Western Conference lamah LA Galaxy chuan goal hnih chhuah zet chungin derby game-ah 4-2-in Los Angeles FC an hneh ve bawk.