A nih leh…

India sawrkarin Forest Conservation (Amendment) Act, 2023 a siam ta a. Parliament-in he dan a pawm hma khan draft bill kha public-ah pholan niin, NE state-te pawhin kan sawisel hlawm a; mahse, India sawrkar chuan ngai pawimawh lovin a kaltlangpui lui ta a.
He dan hnuaiah hian ram dang nena kan inrina (international border) atanga ram chhung Km 100 huam chinah India sawrkarin ram venhimna atana pawimawh chhuanlamin ram hectare 10 (Km khat bial) chu tul a tihna hmun apiangah a sat kaw duai duai zel thei tawh dawn a; tunhmaa forest clearance lak hmasak phawt ngai ang kha a awm ve tawh dawn lo tihna a ni. Mizoram hi a vang lam km 100 vel lel lek a ni a, Myanmar leh Bangladesh-in min karcheh avang hian Mizoram khawi hmun maiah pawh hian hectare 10 chu ramngaw a ni emaw, ni lo emaw, sawrkar laipuiin ‘national security’ chhuanlam hmangin a vai kaw duai duai zel thei tawh dawn tihna a ni. NE state dangte pawh hi Mizoram ang thova tuar thei vek an ni, Assam hi chuan a tuar nep deuh mahna.
Ni e, he Dan hi kan tan chuan a lawmawm loh a, a tha lo hle dawn niin a lang. Mizoram sawrkar pawh hian tun tum session hnuhnung ber neih turah hian he dan hi a pawm ve loh tur thu putluh a tum tih thawm hriattur a awm nghal a. He dan hi kan dodal a, kan duhlohzia pawh langsar taka kan lanchhuahtir hi a pawimawh hle ang.
Chutih rual chuan, ‘A nih leh…’ tiin han chhunzawm ila. Kan ramngawte heti taka kan humhalh lai hian, kum tina thingtlang loneihna avanga ramngaw kan thiah thin zau zawng hi kan chhut ngai em? Thingtlang loneih bansan hi ramngaw (environment) humhalhna a ni tih pawh kan hria, ram hruaitute hlei hleiin an sawi nasa; chutih laiin kum tin ramngaw hal kang dur dur lo zawnga leileta siam theih ram awl hectare singnga kan neihte hi kan rula raw neih leh mai mai a nih chuan, he Dan kan duhlohnaa hma kan lak nat tluk zet hian thingtlang loneih bansan tur hian hma kan la na ve reng em? tih zawhna hi mi tinin homework atan i hmang theuh teh ang u.