A sakhming kan hriat lar Ngengpuii a awm ta lo

Mizo rimawi khawvela hming dai tawh lo tur, mahni style nei, aw danglam tak, a zai ngaina tawh lak lawhin an kham theih loh, a sakhming kan hriat lar, ‘A sakhming pawh ka hriat loh kha’ tih hla satu Lalngengpuii Tochhawng, kum 51, chuan August ni 1, tlailam dar 3:50 khan chatuan ram min pan san ta. Ngengpuii hi kal (kidney) tha lo avangin Greenwood Hospital, Bawngkawn-ah dah luh a ni a, ICU-ah enkawl a nih hnuah mual a liam ta a ni. Ngengpuii hian a fanu Lalbeiseii a kalsan a ni. Ngengpuii hi nizan khan Bengthleng Venglaia an chenna inah lumen niin, vawiin chhun dar 12-ah vui a ni ang.
Ngengpuii hi 1990’s chawhnu lamah Mizo rimawi khawvelah a rawn invawrh chhuak a, ama hla phuah ‘Min Hrilh Rawh’ tih hla chua lar chhuahna leh kan hmelhriat tanna niin, local cable TV hmasa LPS hla thlan vanglai pawhin hla thlan nasat pawl a ni. Chumi hnuah C. Lalthazuala (Bematuale tia kan hriat lar) hlaphuah ‘A Sakhming Pawh Ka Hriat Loh Kha’ tih hla hmangin a hma aia nasain a rawn invawrh chhuak leh a, Hmangaihzuala hla ‘Duhaisam’ pawh a lar pui hle a, heng bakah hian a hla dang ‘Ngaiin Ka Rawng Zawng Zel Che,’ ‘A Va Mak Em,’ tih te leh AZZ a feature-na ‘Leng Dun Ang’ tih hla te pawh a hla lar hrang hrang zingah a tel.