A thlawna thisen pek ni hmang

October 1 kha National Voluntary Blood Donation Day a ni a, kuminah remchan zawkna avangin October 3 khan Mizoramah chuan hman a ni.
Aizawlah Mizoram State AIDS Control Society (MSACS) leh Association for Voluntary Blood Donation (AVBD) huaihawtin hman a ni a. Zoram Medical College assistant professor Dr Sangzuala’n thisen pe turte tana nunphung hrisel neih dan tur a sawi a. MSACS assistant director F Lalmuanpuii’n a thlawna thisen pek chungchang a sawi. MSACS joint director Dr Richard CLR Hluna leh Synod Hospital-a consultant Dr Lalchhanhima ten HIV/AIDS chungchang an sawi bawk.
National Voluntary Blood Donation Day hi district dangah pawh hman a ni a, a thlawna thisen pek pawimawhna bakah HIV/AIDS laka himna tur inzirtirna atan hman a ni.
Siahaah chuan thisen pek runpui neih nghal niin, mi 10-in thisen an pe a, ECM Higher Secondary School leh Don Bosco School zirlaite an ni.
National Voluntary Blood Donation Day hi kum 1975 atangin October 1-ah hman thin a ni a, kumtin thupui thlan bik niin, kumina thupui chu ‘Give blood, give plasma, share life, share often’ tih a ni. Kuminah hian Pathianniah a tlak avangin Thawhlehni khan hman a ni.