A tlem zawk inlulin theihna..

Sawrkar hnathawk zingah a tam zawk chu thil tha duh leh thahnemngai tak an awm nia a hriat thu department of personnel and administrative reforms minister chuan Mizoram Departmental Officers’ Association inkhawmpui a hmanpuinaah a sawi a.
Minister hian ‘nia a hriat thu’ a sawi mai a ni a, a fact and figure hriat chian ni chiah lo mah se, hei hi a dikin a rinawm.
Chuti a nih chuan, sawrkar hnathawk zinga a tlem zawk daih hi thil dik lo tih ching, eiruk ching, hlemhle, thil tha lo ti thin an nih chuan, a tlem zawk thuhnuaiah a tam zawk an awm tihna emaw, ‘a tlem zawk an inluling a, chu chu kan tuar’ tihna emaw a lo ni ang a, a tlem zawkin a tam zawk an duh duhin an bawhbet thin, tihna te pawh a ni thei awm e.
Tunhma khan zuruite an inluling thei hle a, khawlaiah an pai tuang tuang a, kawngkal mipui rikrap an ching a, hmeichhia leh nunau tam tak an thlabar a, chutih laiin a lehlamah chuan ‘zu rui khin ur ur te chu…’ kan ti leh hlauh thin a. |henkhat chuan zurui chu khin loh tur ang hial te pawhin an sawi thin awm e. Zu rui thin mi sawm vel khawlaia an kal chuan a rui ve lo za tam tak an ralti hlauh thung.
Chumi awmzia chu a tlem zawk an inlung ngam a, a tam zawkin engtin mah an ti ngam lova; a tlem zawk thuhnuaiah a tam zawk an kun, tihna a ni ber awm e.
Kan ram dinhmun pawh hi han bih chiang ila, eiruk ching chu mi tlemte an ni, thil tha duh hi a tam zawk an ni, tiin kan inhnem vel mai mai ni te pawh hian a lang a. A tlem zawk thil tih dik loh chu a tam zawkin kan tuar tlawk tlawk mai a ni ber a. Khawi iloa thianzaho titinaah emaw, seminar-ah emaw, eirukna a hluarzia kan sawi pap pap laiin, eiru mekte chu kan khing ngam leh hauh si lo. Zurui kawng kal hlaua hel du du thin kan nihna hi hetiangah pawh hian kan la chhawm zel niin a lang.